Rampum huapa Oil leh Gas renchem pual chawlhkar hnih chhung January 15 - 31, 2014 hman mek chu Mizoram ah pawh hman ve tan niin a hawnna hun I & PR Auditorium-a vawiin chhun a neih chu FCS & CA Minister Pu John Rotluangliana’n hmanpuiin forthnight hi a hawng a ni.

Khuallian FCS&CA Minister Pu John Rotluangliana chuan tuialhthei leh eirawngbawlna boruak alhthei te hi kan tu leh faten hmanve tur an neih ve reng theih nan tun atang hian humhalh leh renchem kan thiam a pawimawh a, chutiang tur chuan an hlutna kan hriatreng fo a tul a ni, a ti. India rampum tuialhthei mamawh zawng zawng za a sawmsarih hi ramdang atanga chawkluh an ni a. Ramchhung mamawh hmun thuma thena hmun khat pawh kan thar chhuak zo lo a ni tiin heng atang ringawt pawh hian oil leh gas mamawhna san zel karah renchem taka hman a pawimawh zia a lang a ni, a ti a. Lirthei atana oil mamawh renchem dan mawl te te anga lang te, eirawngbawl laia gas ren dan te mawl lua leh te lua awm lova zawm thiam a tul takzet a ni, a ti bawk.

Forthnight hawnna inkhawm hi Secretary & Director FCS&CA Pu R. Lalvenan a kaihruai a. A kaihhruaina in kalkhawm mipui ten oil leh gas renchemna tur thu tiam an chhiar chhuak a ni.

Forthnight hawnna inkhawmah hian lirthei senral oil renchem dan bik Director of Transport in a sawi a. Gas dealer lam atangin eirawngbawlna gas renchem dan leh hnianghnar taka awm harsat dante sawichhuah a ni bawk a. Consumers Union lam atang pawhin hriattur pawimawh tangkai sawi niin vawiin inkhawm hi Manager (Retail Sales) IOC Ltd. Aizawl Pu K.V. Nelan lawmthu sawiin hun a khar a ni.