2314/2022-2023
Aizawl 14th October 2022: Construction Skill Development Council of India (CSDCI), Govt. of India leh State Institute of Rural Development & Panchayati Raj (SIRD&PR), Mizoram tangkawp buatsaihin vawiin ni 14.10.2022 khan SIRD&PR Auditorium, Durtlang Leitanah “One Day Workshop on National Apprenticeship Promotion Schemes (NAPS) with Construction Skill Development Council of India” neih a ni a. Pu Lalramsanga Sailo, IRS, Secretary, Labour, Employment, Skill Development & Entrepreneurship (LESDE) Department chuan Khuallian niin, he training hi a hawng a ni.

Training hawnna hun Pu Lalhmunsanga Hnamte, Director, SIRD&PR kaihhruaiah hian, Khuallian Pu Lalramsanga Sailo chuan hetiang ang Workshop pawimawh tak mai construction chungchanga India rama hmalatu leh thuneitu CSDCI leh SIRD&PR, Mizoram-ten tangkawpa an buatsaih thei chu lawmawm a tih thu sawiin, vawiina lo kal khawm Department hrang hrang te leh Private Firm/Agency-a thawkte pawhin an tangkai pui ngei a beisei thu a sawi bawk.

Khuallian chuan Mizoramah Construction Workers kan la tlem a, hnamdang kan chhawr nasa em em a, chuvangin, nasa zawka hma kan lak a, kan Mizo thalaiten hetiang lam hna an thiam a, an tui theih nan vawiina lo kal khawmte hi kan pawimawh a ni, a ti a. Mizoramah CSDCI hnuaiah Certificate pe chhuak thei Training Institute 2 chiah kan la nei a, tan kan lak a ngai a ni, a ti bawk.

LESDE Secretary chuan Firm/Agency-te hian kan Mizo thalaite Construction Works thawk thei tur tam zawk chher chhuak a, chung mite chu tam zawka kan chhawr pawh a ngai a ni, a ti a. Inhlawhfa/Kuthnathawktute tana hamthatna awmte nasa zawka kan hman tangkai a tul thu a sawi bawk. Workshop nei tura kalkhawmte chu Skill Development lama an hriatna tipung a, hna tha zawk thawk thei tur leh hlawkpui ngei tum tura sawmin, Workshop hi a hawng a ni.

Training hawnna hunah hian Er. C. Lalthlansanga, Core Faculty, SIRD&PR leh Pi Cheshta Saxena, Assistant Manager, CSDCI ten an hun hman dan tur tlangpui an sawi a, Pu Pinaki Sarkar Deb, Senior Manager, CSDCI pawhin thu a sawi bawk. Pu Khawlsiamthanga Khawlhring, Associate Professor, SIRD&PR chuan lawmthu sawiin Workshop hawnna hun hi a khar a ni.

He Workshop-ah hian Construction Works lam khawih Sorkar Department leh Private Firm/Agency hrang hrang atangin mi 33 leh SIRD&PR Faculty-te an tel a ni.