No.1172/2021-2022

Aizawl the 29th June, 2021 : Pu L. Thangmawia, MLA & Vice Chairman, HRD Board kaihhruai 'Online Education Committee' te chuan Covid-19 hrileng avanga sikul khar ngai leh chumi nghawng avanga zirna pangngai kalpui theih loh laia mumal zawka zirna kalpui dan tur ngaihtuahin vawiin chawhnu dar 2:00 PM khan Directorate of Education, Treasury Square-ah an thu khawm.

He committee hian Covid-19 hrileng in zirna kalphung pangngai a nghawng dan ngun taka zirchiangin survey te neih a ni a. Hemi bakah hian mumal zawka zirna kalpui a nih theih nan Inkaihhruaina (Guidelines) siam tha tiin sorkarin a ngaihtuah chhunzawm turin Ministry of Education, Govt. of India –in kaihhruaina a siam – PRAGYATA dungzuiin Draft Guidelines for Education during Covid-19 Pandemic chu sorkarah thehluh tura buatsaih a ni bawk.

He guidelines hi Committee chuan a pawmpui nghal bawk a, harsatna dang a awm loh chuan Dt. 1.7.2021 hian sorkarah thehluh tum a ni. He committee hian online education kalpui nana hmanrua (device) zirlaiin ten an neih dan leh a nei ve lote dinhmun te zirchiangin hmanrua nei ve lote ten zirna tha an dawn ve theih dan tur te zau taka sawiho in rawtna an thlen a ni.

Committee-ah hian Department chhunga officers, ICT Department aiawh leh MZU atangin an tel bakah sawrkar sikul leh private school-a zirtirtute aiawh te an tel bawk a ni. Ruahman lawk ang chuan he committee-in rawtna leh inkaihhruaina a siamte hi sorkarin a ngaihtuah hnuah July thla chhung ngeia hman nghal theih beisei a ni.