3625/2024-2025

Dated Kolasib the 19th December 2024: Vawiin tlai khan Pangbalkawn, Kolasib a Om Om Modern Rice Mill ah Mizoram Buh thar lei tanna Program hman a ni a. He hun hi Pu PC Vanlalruata , Minister, Agriculture and Farmers Welfare Department chuan Khuallian niin a hmanpui a, Pu Lalfamkima , Deputy Speaker, Mizoram Legislative Assembly chu Khualzahawm a ni.

Khuallian Pu PC Vanlalruata, Agriculture and Farmers Welfare Department Minister chuan thusawina hun hmangin vawiin a an hun hman chu Mizoram tana mellung an phunna pawimawh tak a ni, a ti a. Buhhum lei chu an manifesto ah tel ve lo mahse Sawrkar in loneitute hmakhua a ngai pawimawh hle a, chuvang chuan pilot project atan Mamit leh Kolasib ah bul tan a ni, a ti a. A rate hi kumin atan chuan KG ah Cheng 30 zel a ni anga, amaherawhchu a kum a zirin  rate an puang thin dawn a ni, a ti.

Sawrkar na lo chang tawh ten Policy hran theuh an neih thu sawiin, ZPM sawkar ina an Policy chu kuthnathawk leh loneitute dinhmun chawisan a, anmahni kaltlanga ram tih hmasawn a ni, a ti a. Lo neituten an tharchhuahte awlsam taka an hralh zung zung theih nan market linkage chu sawrkar chuan a ngai pawimawh hle a ni tiin, farmer te leh market te suihfin an tum a, an suihfin mek a ni , a ti bawk.

Minister chuan vawiina  Pangbalkawna an hun hman chu a bul tanna ani, a ti a. Kum lokal leh zel turah te pawh hmun hrang hrangah sawrkar in loneitute buh tharchhuah a leina hmun rice mill chu  Mizoram hmun hrang hrangah a awm chhoh zel a beisei thu a sawi a. Mizoram sum pawn lamah buh lei nan cheng tamtak a chhuak thin chu a vei thu sawiin, kan economy siam turin kan ramah ngei  hian pawisa lengvak a tam a ngai a ni, a ti a. Chumi puitlin tur chuan loneitute chu te tan la  zual sauh turin a chah a , kuthnathawktute tan sawrkar chu a ding reng dawn a ni, a ti.

Pu Lalfamkima, Deputy Speaker leh Kolasib Bialtu MLA ni bawk pawh in thu sawiin, Mizoram buh thar lei tanna hun an hmang chu Mizoram mai bakah a bial tan a lawmawm in a chhinchhiah tlak takzet a ni, a ti a. Vawiin a an hun hman a danglam bikna chu a leitu leh thawkchhuaktu Department ten thawhdunna tha leh inpekna tak tak an nei tih a lang a ni tiin, Vawiin hunah pawh Agriculture Department Minister leh Secretary leh Food and Civil Supplies Department Secretary te an lang thei chu a lawmawm hle a ni, a ti.

Pu Lalfamkima chuan Sawrkar in mipui hmasawn nan theihtawp a chhuah a, mipuite pawh in hmasawn tur chuan anmahni an in pek ve angai a ni, a ti a. Ram hmangaihna rilru put a pawimawh thu sawiin, swwrkar hnathawk leh kut hnathawktute pawh anmahni zawn theuh ah rinawm leh taima taka thawk tur an ni, a ti. Mizoram hmasawnna thlentu ban pawimawh tak chu thalaite an ni tih sawiin, thalaite chu kuthnathawh lama  an harh chhuah angai a ni, a ti bawk.

Pi Zodingpuii, IAS, Secretary,FCS&CA  chuan Mizoram sawrkar chuan Mizoram pawn lam atangin thlatin Buhfai quintal 44000 vel an lei thin thu a sawi a. Chumi man atan chuan thla tin Vaibelchhe 15 vel a kalral a, chuvang chuan FCS&CA Department chuan sum thahnem tak ram danga luang chhuak mai lova Mizoram thar atanga an lei hun an nghakhlel hle a ni, a ti. Hemi piahlam ahhian Mizoram thar buhfai ration a sem theih vek hun an nghakhlel takzet a ni, a ti bawk.

TPDS hnuaiah card eng leh card pawl sawrkar laipui in a rawn chhawpchhuak a. Card pawl hmanga kg5  an dawn thin bakah kg 3(kg 1 a cheng 15 zel) state sawrkar chuan a belh leh a ni, a ti. Heng bakah hian Card var (Rs 30 per Kg) te chhawp chhuak leh in chumi hnuah  Card Sen (Rs 20 per Kg/head) chu Mizoram State Special Ration Package hmanga sawrkarin card eng leh pawl a leng ve lo te tan a ruahman thu a sawi a. Hengte avang hian Mizoram Sawrkar chuan buh lei nan sum nasa takin a seng a ni, a ti.

He hun kaihruaitu Pi Ramdinliani, IAS, Special Secretary to Agriculture and Farmers Welfare Department, Mizoram chuan vawiin a an hun hman chu Mizoram pumpui tan ni chhinchhiah tlak leh bungthar an kai na a ni, a ti a. Vawiin ah ringawt mimal, FPO te ,PACS te leh Society hrang hrang atang buhhum lei tur Quintal 418 zet an phur thleng a ni, a ti. Mizoram loneitute atanga Buhhum lei chu Sawrkar in policy anga neih ngheh chhoh a tum mek a ni a, tun hi a bul tanna a ni, a ti. Loneitute harsatna hria in Central aia man sang zawkin Mizoram sawrkar chuan cheng 30 in support price a puang a ni a ti a. Loneituten hlawk zawka an thar chhuah theih dan tur pawh sawrkar chuan a ngaihven hle thu sawiin, lo neih nana khawl hmanga hmanraw tha zawk hman a nih theih dan tur pawh a ngaihtuah chho zel a ni, a ti.

Mizoram Buh thar lei tanna hi Banakaih Policy hnuaia Mizoram sawrkar in phai lam atanga buhfai an chawk luh thin tihtlem na tur leh loneituten an lo tangkaipui zawkna tura Mizoram loneitute tharchhuah buhhum a leisakna a ni a. Kolasib leh Mamit District chu Pilot Project atana puangin heng buh te hi khaw hrang hrangah mimal emaw, FPO emaw FPC emaw Society dang kaltlangin an phurkhawm thei a, an phurkhawmna rate erawh anmahni inbiakremna a ni anga, Sawrkar chuan Kg ah Cheng 30 zelin a leisak thin dawn a ni. Report a a lan danin  vawiin khan FPO Bilkhawthlir,zaupui agri co operative society leh mimal buhhum lo phur thleng tute chu sawrkar hian leisak nghalin Cheque hlan nghal an ni.

Vawiin hunah hian Pu PC Vanlalruata, Agriculture and Farmers Welfare Department Minister, Pu Lalfamkima, Deputy Speaker , Mizoram Legislative Assembly, Pi Ramdinliani, Spl Secretary to Government of Mizoram, Agriculture and Farmers Welfare Department, Pi Zodingpuii, Secretary, FCS&CA, Pu Robert C. Lalhmangaiha, Kolasib DC leh Agriculture leh FCS&CA Department hotute leh loneitu thahnem tak an kalkhawm a. Sawrkar hotute bakah Progressive Farmers thlan chhuah te atanga thusawi ngaihthlak a ni bawk a. Program hi Pu Vanlalthlamuana, MAS, Addl Director, Agriculture and Farmers Welfare Department in lawmthu sawina a neih hnuin tihtawp a ni.