Vawiin chawhma khan Lungleia Saikuti Hall-ah Lunglei Govt. College-in Fresher Social cum Graduation Day an hmang a. Parliamentary Secretary Pu Joseph Lalhimpuia chu Khuallian niin a hmanpui.

Pu Joseph Lalhimpuia chuan Education Department-in kalphung thar a hman angin, hna lak tur reng reng ah in sawi pui leh induhsakna a awm thei tawh lo a, a thiam leh tling te dinchhuahna a ni tawh dawn tiin college naupangte chu thiamna tak tak nei turin taihmakna leh tumruhna nena zir turin a chah a. In elna khawvel a nih avangin, a thiam leh a hrat apiang te an hlawhtling ang tiin, thawhrimna nena tan la theuh turin zirlaite a fuih a ni. Zirlai, zirtirtu leh nu leh pa te an tanrual chuan Lunglei chu Education hmunpuia siam theih a beisei thu a sawi. Education Department hmalakna thenkhatte tarlang in, subject teacher hrang hrang la tura sawrkarin Recruitment Rule a siam thu leh hostel rule thar a duan thu te a sawi a. Integrated Evaluation Scheme hman a nih avangin zirlaite an tang hle tawh a ni, a ti. JN Middle School, Lunglei chu Lunglei District-a model school hmasa ber tura thlan a nih thu a sawi a. NEC atangin Mizorama planetarium hmasa ber sakna tur sum hmuh a nih thu a sawi bawk.

Lunglei Govt College Principal Prof. Lalhmangaihi Hrahsel pawhin zirlaite hnenah quality education pe tura theihtawp an chhuah thin thu a sawi a. Zirlaite chu taihmakna leh thawhrimna nen a zir theuh turin a chah a ni.

Lunglei Govt College-ah hian kum 2016-2017 atan freshers 319 admit an ni a. Tun dinhmunah zirlai 853 nei in, teaching staff 60 an awm mek bawk a ni. Kumin Graduate result-ah topper 6 an nei bawk a ni.