Vawiin khan St Paul’s Hr. Sec. School chuan kum 2016 High School Leaving Certificate leh Higher Secondary School Leaving Certificate Exam result chhuaka an school naupang tithate hnenah chawimawina Paulians’ Profeciency Award an hlan a. Award hlanna inkhawmah hian Parliamentary Secretary Pu KS Thanga chu khuallian a ni.
Pu KS Thanga chuan zirlai kalkhawmte fuihin Mizoram State Service duhtawk mai lova All India Service a luh tum ngei turin a chah a, tun dinhmunah Mizo nula leh tlangval Central leh All India Service-a an tlem tak avangin sawrkar hotute lu a hai a ni, a ti. Mizoram pum huapa lang pha zirlai tithate lawmpuina thu sawiin hmabak thui tak an neih hriaa tuna an dinhmunah lungawi a duhtawk mai lo tur leh nasa lehzuala thawkrim turin a fuih a. Ram leh hnam tana rotling ni tur leh state dang thalaite el phak ngei tura tan la turin a fuih a ni. Parliamentary Secretary chuan St Paul’s School chu a din tirh atanga tun thlenga Mizoram school tha ber nihna dinhmun luahtu, zirlaite rilrua zirna lungphum nghet tak siamna kawnga hna pawimawh tak thawktu an nih avangin Mizoramah dinhmun pawimawh tak a chang reng a ni, a ti bawk.
Profeciency Award hlan takte hi HSLC 2016 exam-a pahnihna dinhmun hauhtu Vanlalruatdiki, pangana Angela Vanlalhmangaihi, pasarihna Vanlalhruaitluanga, leh pakuana Lalawmpuia te bakah subject hrang hranga topper te an ni a. HSSLC 2016 Exam Science stream a pakhatna Emily Vanlalnunsangi, pahnihna Snehasudha Subhadarsini Sahoo, palina Amit Ranjan Jha, pangana Lalzara, parukna Suparna Maiti, pakuana Lalruatfeli leh sawmna Wahengbam Loyanganba te; Commerce Stream-a pakhatna Lalremliana, pathumna Lalbiaknunga, pangana R.Lalmuankimi leh pasarihna Rahul Sharma bakah subject hrang hranga titha ber te hnenah profeciency award hi an hlan a ni.
St Paul’s Hr. Sec. School atang hian pawl sawmpahnih Science subject-ah exam zawng zawng 154 atangin Distinction-ah 32, First Division-ah 94, Second Division-ah 27 an pass a. Commerce-ah Distinction 4, First 26, Second 11, Third 2 an nei bawk. Pawl sawmah hian zirlai naupang 323 exam-in an vaiin an pass vek a. An zinga 152 chu Distinction ah hlang kaiin 129 chu First Division-ah an pass a ni.
He school atanga zirchhuak Paulians’ Alumni Association aiawhin an President Dr.K.Lalbiakzuala’n zirlaite fuihna thu a sawi a. St Paul’s HSS Principal Bro.Dr.T.J.Jose chuan kalkhawmte lawmna thu a sawi bakah an school dinhmun tlangpui a tarlang bawk. Zirlai naupangten zai leh lam hmuhnawm tak tak an entir bawk a ni.
