Vawiin khan Siamsinpawlpi(SSP),Headquarters, Aizawl dinchampha phak vawi 25-na lawman Vanapa Hall a buatsaih ah Education Minister Pu H.Rohluna chuan zirna thil tum pawimawh lai ber chu mithiam chhawrtlak leh mi puitling chher chhuah a nih thu sawiin exam na pass vanga pawl sawn ringawt a tawk loh thu a sawi. Siamsinpawlpi, Mizoram bik hi kum 1989 a din a ni a, vawiin a hman tak Silver Jubilee ah hian Pu Lalrobiaka, MLA, Pu Lalthanliana, MLA, Er. Lalrinawma, MLA leh Pu Zarzoliana, Chairman, AMC te chu Special Guest ah sawm an nih ang in an tel a ni.
SSP Silver Jubilee a thusawitu, Education Minister chuan zirlai pawl hrang hrang te chu zirlaite tanpui tur leh zirna tih hmasawnna atana din an nih angin zirna huang chhungah hma la thin turin a chah a. Zirna pawn lam thila tui zirlai ni si an tam ta lutuk hian Mizoram ah zirna a tichhia a ni a ti.SSP pawh in a theihtawp a Mizoram pum huap piah lamah Paihte community chhunga zirna tih hmasawnna atana theihtawp a lo chhuah avanga lawmawm a tih thu a sawi a ni. Zirna chuan mimal nun a tihhmasawn bakah inrintawkna te a siam sak a, nu leh pa tan pawh fate tana zirna tha pek chu an mawhphurhna lian ber leh an fate tana rohlu ber siamsakna a nih thu a sawi a. ro sum leh in thapui pui fate tana siamsak pawh hi chhe thei a nih bakah a enkawltu tur a fel loh phei chuan awmze neilo mai a ni thei a, zirna erawh chu nget ve theilo rohlu a ni a ti. Mark tha ringawt um lovin, pawl sawn ringawt ngaihtuaha exam hmachhawn lova, zirna hmanga thiamna tak tak neih tumna rilru zirlaiten an neih a ngaih a tul takzet tawh thu leh zirtirtute pawhin pass percent tha hrim hrim atchilh lova thiamna tak tak zirlaite pek an tum a ngai tawh a ni a ti.
Hun hnih ah then, SSP silver jubilee hi SSP, headquarters, Aizawl leh Silver Jubilee Celebration Committee hotuten programme hi kaihruaiin SSP Silver Jubilee puala Magazine buatsaih pawh he hunah hian Education Minister Pu H.Rohluna in a tlangzarh nghal a. SSP hruaitu hlui te chawimawina hun hman a ni a, SSP, General headquarters hruaitute pawhin Silver Jubilee hi an rawn chhim a ni.
