3238/2023-2024

Dated Ngopa the 5th January 2024: Vawiin khan Ngopa Zawlbukah Mizorama Thalai khawmpui lian ber KTP General Conference ni 29 February atanga ni 3 March 2024 chhunga neih tur chungchangah thil tul leh mamawh hrang hrang awm thei te inbuatsaihna leh kalpui dan tur inkawmhona neih a ni a, he inkawmhona hi bialtu MLA, Minister ni bawk Pu F Rodingliana hova neih a ni.

P&E Minister Pu F Rodingliana chuan thusawi in, KTP General Conference 2024 chu a bial chhung khua Ngopain an thlen turah felfai tak leh mawi taka thlen a nih theihna turin leh khawmpui palai lo kal te pawhin nuam leh hahdam taka inkhawmpui an hman theih nan Sorkar Department hrang hrang ten mahni chan theuhah theihtawp chhuah turin a chah a. Minister chuan Sorkar ang chuan sumfaia tanpuina chu tun dinhmun ah a awm loh thu sawiin, amaherawhchu buhfai, kawlphetha, tui leh inkalpawhna kawng ah erawh Sawrkar in theihtawpin hma a la dawn a ni, a ti.

Ngopa khua in KTP General Conference a thlen tur chungchang chu Chief Minister pawh a sawipui tawh thu sawiin Sawrkarin a tih tur chin chu tihhlawhtlin ngei a nih tur thu a sawi a. Minister chuan Sawrkar chu mipui vanga awm a ni a, kohhran pawh mipuite ta a ni a chuvang chuan Kristian ram kan nih avangin Sawrkar hetiang hun pawimawh a a lo chet ve chu a tul thu a sawi bawk a ni.

General Conference thlengtu Ngopa KTP General Conference Organising Secretary atangin inkhawmpui an inpuahchah dan report ngaihthlak a ni a. Report-a a lan danin inkalpawhna chungchangah theihtawp a hmalak a ni a, Traffic chungchang pawh felfai zawka kalpui a nih theih nan Kawlkulh lam atanga motor kal theiha siam a tul thu pawh sawiho niin, Saitual ADC leh NHIDCL hova lo enfiah zui atan ruahman a ni.

Vawiin a thuthkhawmna hi Pu H Lalramliana,SDO(C)Ngopa in a kaihruai a. Pu Lallawmawma Additional DC,Saitual, Pu Duhsanga,SE(P&E), Pu Vanlalzawma SE PWD, Er Lalremmawia,Dy Controller of Mine,Geology & Mining, Pu L Zatluanga Sr SDO,PHED. te bakah  Sawrkar Dept. hrang hrang aiawh te, Central KTP aiawh te, All NGO aiawh te ,All Party aiawh te, Ngopa Welfare Aizawl, leh NHIDCL atangin awihawh te an tel a ni.