622/2025-2026

Aizawl dated 28th May 2025: Vawiin khan Power & Electricity Department Minister Pu F Rodingliana chuan 132kV Sub Station Sihhmui ami chu Pu TBC Lalvenchhunga, bialtu MLA nen tlawhin Sub-Station chhia siamthat dan tur an sawi dun.

Thawktute tarlan danin May ni 26 tlai dar 5:20 khan 132kV Sub Station Sihhmui a 33kV Current Transformer chu kang chhiain, he Transformer chhia hian 25MVA, 132/33kV Power Transformer a khawih chhia a. Hemi avang hian Sihhmui Sub-Station atanga kawphetha la chhawng, Sairang Sub Station, Lengpui Sub-Station, Rawpuichhip Sub-Station, W.Phaileng Sub-Station, ISPAT, PHE 37MLD Water pump-te leh an chawm khua ahte kawlphetha an hmu thei ta lo a ni.

P&E Minister chuan Transformer chhiat vanga harsatna sutkian vat a nih theih nan bialtu MLA nen a hmun ah an endik a. Powergrid Corporation of India Limited(PGCIL) hotute pawh a tul anga hma latur a hrilh nghal niin Sihhmui Sub-Station bul hnaia awm, PGCIL Bay hman tangkai a, rang taka power supply pekchhuah leh dan tur ruahmanna an siam a ni.

Ruahmanna ang chuan Sihhmui Sub-Station bul hnai a awm, PGCIL khawl (bay) hmangin Sihhmui Sub-Station-a 25MVA Transformer chhia thlakna tur power transformer thar chu tihnun(charge) a ni ang a. Transformer tihnun a nih chhung hian Luangmual leh Sihhmui inkar 132 kV line chu 33 kV a tihnun a, kawlphetha lak luh nan hman lailawk turin ruahman a ni a. Amaherawhchu kawlphetha pek dan pangai a kalpui leh a nih hma chuan he powerline tan hian load a san deuh dawn avangin peak load laiin Load Shedding siam a ngai thin tur thu thawktute chuan an sawi.

Minister hi Pu TBC Lalvenchhunga, Adviser to Chief Minister leh Engineer-in-Chief bakah P&E Department-a Engineer dangten an tawiawm a ni.