621/2025-2026

Aizawl the 28th May, 2025: Vawiin khan School Education Directorate Conference Hall-ah Meichher Award 2024 sem a ni a, School Education Minister Dr Vanlalthlana'n khuallian niin he hun hi a hmanpui.

Minister chuan he hunah hian thusawiin Meichher Award 2024 sem a lo ni leh ta chu lawmawm a tih thu a sawi a. Thu ziah hi thil awlai lo tak a nih avangin thuziak mite chu amah cho thartu an nih fo thu a sawi a. Minister chuan Meichher chanchinbu hlutna chu tun hma atangin Mizoram history pawimawh leh thu leh hla tha tak tak chhuahna a ni a, Mizote tan thil hlu dahna ang a ni a, Meichher chanchinbuin thu leh hlaa hnuhma a neihte chu a hlu hle a ni a ti. Minister chuan puitling tawh te ziak leh chhiar zirtir chu thil awlai lo tak a nih thu sawiin Adult Education Wing hian kum lama upa tawh ten ziak leh chhiar an thiam theih nana an hmalaknaah fak an phu a, ULLAS scheme hnuaia full literacy state kan puan theihna pawh Adult Education hnathawh rah hi a ni a ti a. Ziak leh chhiar zirtirtu volunteer teacher-te thawhrimna chhuanawm a tih thu leh lawmawm a tih thu a sawi bawk.

Meichher Award 2024 dawngtute chu Meichher Best Article of the year 2024-ah Pakhatna Rev Dr Lalchawimawia Zemabawk Aizawl; pahnihna Prof Chawngsailova Chawlhhmun Aizawl; pathumna Rev V. L. Luaia Hranleh Mission Veng te an ni. Meichher Best Contributor of the Year 2024-ah Pakhatna Pu B. Lalthangliana Chhinga Veng, Aizawl; pahnihna Pu Familia Fanai Laltansanga Zotlang, Lunglei; pathumna Pu Mahmuaka Chhakchhuak Chanmari Lunglei te an ni.

Pu T.C.Lalremsiama Editor Meichher report-a a lan danin Adult Education Wing-in an tihchhuah thlakip chhuak chanchinbu 'Meichher' hi a tirah chuan 'Zoram Eng' tiin tihchhuah a ni a, kum 1975 March & April thla chhuak kha a bul tanna a ni a, amaherawhchu, a túlna leh remchân zâwkna avângin “Zoram Êng tih chu kum 1975 October thla chhuak atangin 'Meichher' tia a hming thlâk a ni a, tun thleng hian a hming thlâk tawh lovin 'Meichher' hi tihchhuah chhunzawm a ni ta a ni. Kum 1975 March & April thla chhuak ațanga chhiarin May 2025 chu bu 807-na a ni.

"Meichher' hi sawrkår sum sêngin a tîr ațangin thla tin bu 3000 zêla tihchhuah a ni a, a thlawna sem a ni. Hripui COVID-19 lêng harsatna avâng khân "Meichher' pawh thla eng emaw zât chhủng chu bu 2800-a tihchhuah a ni a; mahse, kum 2022 November thla ațanga tûn thlengin bu 3000-a tihchhuah zui a ni leh ta a ni Meichher Publisher atân hian tihchhuah tan tirh atangin Department hotu ber Director chu tûn thleng hian hman a ni thin a ni.

    Vawiina Meichher Award 2024 semna inkhawm hi Pi Angela Zothanpuii Director School Education-in a kaihruai a, School Education Department leh a kaihhnawih department officer-te leh thawktute, Award dawngtute leh an chhungte, Mizo Academy of Letters leh Mizo Writter Association hruaitute an tel a ni.