1413/2026-2027

Aizawl the 16th July, 2026: Nimin Ni 15.07.2026 (Nilaini) khan P&E Minister Pu F Rodingliana chuan a Office Chamber-ah Aizawl Power Circle hnuaia Sub-Division pakua a thawktu JE chin chunglamte nen Aizawl khawpui chhunga power supply tha zawka pek dan tur inrawnkhawmna hun an hmang a, he hunah hian division hrang hrang a thawktuten an harsatna hrang hrangte leh a siamthat dan tur bakah an area theuhva power supply khaihlak loa pek theihna tura rawtna hrang hrang an neih te thlenin sawiho a ni.

He hunah hian Sub-Division hrang hrang pakua atanga kalkhawm JE leh a chunglam te hi a inchhawkin sawihona neihpui an ni a, Minister Pu F Rodingliana hian thawktute chu harsatna leh rawtna an neihte kimchang taka sawi turin a sawm a, field-a thawktute atang ngeia ngaihthlak a duh avanga he inrawnkhawmna hi neih a nih thu a sawi.

Aizawl power circle chhunga thawktute thu thlen atangin hmalak zui dan tur ruahmanna chu he huna tel ve Pi K Lalrinzuali IAS, Commissioner & Secretary, Er. Ngursailova Sailo Engineer-in-Chief, Chief Engineer-te leh Superintending Engineer te nen siam nghal a ni a, chung zingah chuan bungraw pawimawh lei ngai leh tihbelh ngai te ngaihtuah nghalin, bungraw quality poh tha zawk lei a, line pawh that ngai awmte pawh division tinah hma la nghal tura inhriattir nghal a ni a, distribution transformer lianin area zau tak a chawm thin chu tih zim a, distribution transformer te zawk pahnih dah belha chawm rel a ni. Field staff-te atanga transformer dah belh ngai report thehluh te hmalak nghal dan tur rel a ni bawk.

Heng bak ah hian 11 kV line thui lutuk, line chhiata thim zau lutuk tih tlem nan leh a thatlohna lai te hmuh chhuah zung zung nan a theihna ah then darhin, a thendarh theih loh line thui te a kar lakah load break switch dah te, 11 kV line Vacuum Circuit Breaker (VCB) a rem chang laia vuah te an rel a ni.

Tin, Aizawl khawpui chawmtu Sub-station te phurrit lutuk tih zangkhai nan sorkar atanga phalna hmuh tawh Lammual-a Sub-Station thar din chu a rang lama tih hlawhtlin dan dap tura rel a ni.

Tin, thawktu duty tur mamamawh tih tlem nan Sub-Station te computerised dan ngaihtuah bakah distribution transformer tin a power lut leh chhuak chhinchhiah nan in-coming leh out-going meter vuah vek tura hmalak tum a ni a, heihi transmission loss tihtlem nan leh sorkar revenue tihpun nan a rang lama hmalak tur a ni. Tin, distribution transformer-a fel lo rang taka hriatchhuah theihna tur khawl vuah tura hmalak nghal tum a ni bawk.

Electric hrui hlui thlak ngai te enfel a, a rang lama report siam turin Sub-Division tin te hriattir an ni.

He meeting-a thu rel pawimawh tak zingah shutdown lak thin tihtlem nan a hrang hranga shutdown la lovin repair and maintenance avanga shut down lak ngai te a hmalam karhnih-a in-report theuha a ruala shutdown lak a nih dan tur ruahmanna siam a ni.

Minister Pu F Rodingliana hian Aizawl Power Circle mai bakah circle hrang hrangte hetiang meeting hi neihpui vek a nih tur thu sawiin, thawktu indaih loh avanga field staff te hah zia a hriatpui thu sawiin Nikhat-a duty tur shift-4 (li)a then thin pawh a theih loh avangin duty-te an rimtawng hle rualin mipui rawngbawlna pawimawh tak a nih zia hriaa thahnemngai taka thawk zel turin thawktute chu a chah a ni.

etiang inrawnkhawmna hi thlaruk danah neih thin rel a ni a, he huna tel thawktute pawhin lawmthu sawiin hetiang hun hi la buatsaih a nih ngai loh thu tarlangin, Aizawl khawpui chhunga power supply tha zawk pek kawngah awmzia thui tak a nei ngei ang tih an sawi a ni.