5019/2025-2026

Saitual, the 27th March, 2026: Vawiin khan Ngopa Jubilee Hall-ah, MHIP Saitual Sub-Headquarters chuan “Mite tanpui” tih thupui hmangin khawmpui vawi 3-na an hmang a, P&E Minister Pu F. Rodingliana chu khuallian niin, Pi Ngurmawii Sailo, Vice President, MHIP General Headquarters, Aizawl chu khual zahawm a ni.

He hunah hian khuallian Pu F. Rodingliana chuan thu a sawi a, MHIP Saitual Sub-Headquarters Conference vawi-3 na an thleng thei chu lawmawm a tih thu sawiin, MHIP chu Mizoram tan malsawmna an ni, a ti. Khuallian chuan Mizoramah khualzin an pung zel tih sawiin, hotel tha leh zu in tur duh vanga Mizoram tlawh an ni lo a, Mizo hnam zemawi leh inhmangaih tawnna chu an hmuh duh ber zawk a ni tih sawiin, hemi kawnga tan la turin kalkhawm te chu a fuih nghal a ni.

Minister chuan Aizawl khawpui chhungah hmeichhia te chu an dinhmun ina a zir loh vanga inzuar te leh mipa hnathawk thei lo home leh jail-ah te tam tak an awm tih a sawi a, tam tak chu nu leh pa inthen, enkawltu mumal nei lo te an ni, a ti. Thalaite nun siam tha turin hmeichhiate chu an pawimawh hle tih a sawi a, Jail awm ngai lo khawpin MHIP te chu tan la turin a fuih a ni.

Khuallian chuan Mizo thuam hrang hrang puan chei te leh kawr chei te chu chawi nung zel tura tan la turin kalkhawmte a fuih a, sawrkar pawhin Mizo thuam chawi lar turin hma an lak mek tih a sawi. MHIP te chu an programme apiangah Kristian kan nihna hre reng a, Zonun zemawi vawng nung tur zel turin a chah a, MHIP Saitual Sub-Headquarters khawmpui chu midang tana malsawmnaa alo chan theih nan a duhsakna sang ber a hlan bawk a ni.

Vawiin khawmpui hi Pi Lalbiaktluangi, President, MHIP Saitual Sub-Hqtrs chuan a kai hruai a, Pi Lalnunpuii, Khawkawn Branch-in hunserh a hmang. Thusawi hi khuallian Minister Pu F. Rodingliana, khual zahawm Pi Ngurmawii Sailo, Vice President, MHIP General Headquarters leh Pi Lalhriatpuii, MJS, Senior Civil Judge cum Secretary, District Legal Services Authority, Aizawl District hnen atangin ngaihthlak a ni. Inkhawm thawh hnihna hi Pi Lalsangkimi, Vice President, MHIP Saitual Sub-Hqtrs chuan a kai hruai a, Pi C. Rosangkimi, Fin. Secy chuan lawmthu sawina hun a hmang a ni. Saitual Sub-Headquarters Conference vawi 3-na hi 26-27th March, 2026 chhunga hman niin, March ni 26, 2026 khan Zo Zan hman a ni tawh bawk a ni.