June 30, 2012 (Inrinni) chawhnu khan PHE Minister, Industries leh Tourism Department chhangtu Pu S.Hiato, Parliamentary Secretary Pu H.Zothangliana leh anni tawiawmtu PHE EIC Pu R.Lalfanliana leh senior dangte chuan officer te chuan tun hnaia cheng vaibelchhe 24.97 man Greater Khawzawl Water Supply Scheme Sorkar Laipuia DoNER Ministry in a rawn sanctioned tak, hmalak tum dan, tui lak tum na hmun ah kalin a hmun hma te an thlir ho a. PHE Department in pumping station leh treatment plant an dah tum na hmun Damdiai lui, Khawzawl panna kawngpui atang kilometre 8 velah hla chu a hmun a panin, a rem leh rem loh dante an en ho a. Ruahman dan chuan Greater Khawzawl Water Supply Scheme ah hian Tuichang lui atanga Damdiai lui kamah tui pump chhoh tum a ni a, helai hmun ah hian treatment plant dah ruahman a ni bawk a. Heta tang hian RO Tlang ah pump chho in, gravity hmanga tui sem kalpui tum a ni.

Khawzawl ah hian Tourist Lodge thar sakna hmun tur Tourism Department senior officer te nen an enho bakah Kawlkulh a India Tourism Development Corporation in Tourist Lodge an sak mek chu an endik nghal bawk a ni.

Kar hmasa (June ni 27 leh June ni 30 inkar) a zinna ah hian PHE Minister Pu S.Hiato leh Parliamentary Secretary Pu H.Zothangliana te chuan khaw hrang hrang – N Vanlaiphai, East Lundgar, Khawbung, Vaphai, Farkawn, Zokhawthar, Hnahlan leh Khawzawl te a tlawh a. Heng khua ah te hian khawtlang hruaituten tui hnianghnar zawka an neih theih nan an mamawh te an thlen a. Minister leh amah tawiawmtu PHE Department EIC Pu R.Lalfanliana leh officer dangte chuan khawtlang hruaitute ngenna chu uluk takin an ngai thla a, hma lak theih dan leh bawhzui theih dan te an sawiho nghal a ni.