June ni 29 tlai lam khan Tourism Minister, PHE leh Industries Department changtu ni bawk Pu S.Hiato, Parliamentary Secretary Pu H. Zothangliana leh Champhai bialtu MLA Pu T.T. Zothansanga te chuan Hnahlan Tourist Lodge hawnna programme an hman zawh hnu in, Hnahlan Winery a tlawh a. Winery an fan kualna ah hian chipchiar takin Grape an sawr dan te, a fep an dah khawl dan te, sawngbawl anih dan te leh wine processing kalhmang dang te chu Winery a hnathawktute hian lo hrilhin, tui hnianghnar zawka an mamawh thu leh harsatna dang an neih te chu Minister hnenah hian an thlen nghal a. Minister hian hnathawktute leh Hnahlan khaw mipuite thahnemngaihna leh inpekna chu fakawm a ti a, Sorkar in Winery tan hian theiHtawp a chhuah zel tur thu a sawi bawk a ni.

Hnahlan ah hian in 600 bawr vel a awm a, chhungkaw za zelah sawmriat vel in grape an ching a. Winery hi kum 2007 khan Mizoram Rural Bank atanga loan la in, bul tan chho a, tunah hian an loan lak chu engemawzat an rul tawh a. Grape atangin a khaw mipuite hian hmasawnna tam tak an neih thu khawtlang hruaitute hian an sawi lang a ni.