2663/2025-2026

Aizawl, 15th December, 2025 : PHED Minister Prof. Lalnilawma’n vawiin khan Jal Jeevan Mission hnuaia thawh Tlungvel Multi Village (Tlungvel & Darlawng) WSS, Tuirini Grid pumping a hawng a, he hnathawh nan hian cheng nuai 1342.00 sen niin, he tui pump hi mi 5210 chawm thei tura ruahman a ni.

Tuirini Pump House complex-ah hawnna inkhawm buatsaih niin Prof. lalnilawma chuan Mizoram sawrkarin mipui te tui thianghlim hnianghnar zawk a pek a ngaipawimawh hle a, chumi tihlawhtling tur chuan PHE Department a thawktute nen thawhhona tha tak hnuaiah theihtawp an an chhuah tih a sawi a ni. Minister chuan PHE Department chuan mipui tui supply chungchangah a ni emaw, Department hmalakna lam chi ah reng reng mipui harsatna sut kian sak turin, a theihna chinchin ah theihtawp a chhuah mai bakah, mipuite harsatna dawng sawng thei turin a in hawng reng tih a sawi.

Prof, Nitea chuan sawrkarin RD&A Department kaltlang tuihna humhalh turin hma a la mek tih sawiin, sawrkar hmalakna mipuiin nasa lehzual zawk a tawiawm turin a sawm a, kan tuihna te a kum telin a kang in, a tla hniam telh telh niin a lang a, hemi avang hian kan ramngaw mai bakah kan lui te, kan nungcha te kan humhalh a, duat taka kan enkawl a tul takzet a ni,a ti bawk.

Tlungvel leh Darlawng tuia chawmtu tur vawiin a hawn tak hi a project hming chu Tlungvel Multi Village Water Supply Scheme (Tlungvel & Darlawng) a ni a. December ni 8, 2021 khan Adminstrative Approval & Expenditure Sanction hmuh niin, February ni 10, 2022 ah Technical Sanction pek a ni. A satu contractor atan M/S Exelsior Merchants Pvt. Ltd, Chaltlang, Aizawl thlan niin April ni 11, 2022 ah agreement ziahpui an ni a. A sak hna tak hi June ni 6, 2022 ah tan niin April ni 22, 2024 a zo turin inrem a ni. Local Contract & Departmental Works hi January ni 20, 2025 khan zawh fel a ni a. Raw Water & Clearwater Stage-1 Pump trial run hi January ni 31, 2025 ah neih a ni a, Clearwater Stage-2 Pump trial run chu May ni 25, 2025 ah neih a ni bawk.

Tlungvel hi Thingsulthliah RD Block hnuaia khaw pawimawh ber pakhat a ni a. PHE Department ah phei chuan Tlungvel WATSAN Sub Division hming putu leh thuthmun niin kum 2013 khan Sub Division hi din a ni tawh a ni.

Tlungvel khua in water supply scheme mumal tak a neih hnuhnun ber chu Vawmhraw Lui Grid Pumping Scheme niin ni 13.01.2001 khan hawn a ni a. A hun laia 40 Lpcd pe thei tura duan a ni. Private tui connection pawh 128 lai pek niin PHE Department chuan scheme enkawl leh tuisem a buaipui vek a ni. Hun a lokal zel a, a bikin thal laiin tui nikhata darkar 4 chhung chauh pump khawp a lo awm ta a. Chu chuan 25 Lpcd chauh tui pe theiin tui harsatna a lo nasa ta hle a ni.

Vanneihthlak takin Jal Jeevan Mission (Central Govt. flagship programme) lo chhuakin Tlungvel Multivillage Scheme, Tlungvel leh Darlawng khaw tana Tuirini Lui pump leh distribution Network ( Tuizem leh Pipelines) hmanga chhungkaw tin hnena tui pekna tur (FHTC) chu JJM 3rd Annual Plan 2021-22 ah thun a lo ni ve ta hlauh a ni. Detailed Project Report hi Er. H.L Thangvuta, SDO siam a ni a, Tender leh Agreement te leh Departmental hna engemaw zat hi Er. Lalsanglura, Sr EE hun laia tih hman a ni bawk.

Scheme hlawhtlinna atana thil pawimawh tak mai chu ram a ni a. Tlungvel Village Council te hmalakna a ram- Pumping Station No I leh Water Treatment Plant dahna tur phal taka petu Pu Saithanchhunga, Tlungvel hnenah PHE Department chuan lawmthu a sawi a ni.

Vawiin hun hmanna ah hian Er.Ngentluanga,Chief Engineer,Zone-I,Er.H Lalsiamliana,SE RWC bakah Er.Isaac Lalchhuanmawia,Sr EE Serchhip leh PHED Officer & Staff te an tel a ni.