3065/2023-2024

Dated Siaha 15th December 2023: Vawiin khan Er. C. Lalremsiama, Secretary to the Government of Mizoram, Public Health Engineering Department chuan PHE Siaha Division a tlawh a. Executive Engineer (E.E), SDO, PHED Siaha leh Staff ten Secretary hi lo hmuakin lawmna hun an lo buatsaih sak.

Er. C. Lalremsiama chuan EE leh a Staff ten duhsakna an hlan chungah lawmthu sawina a nei a. Siaha mipuite mamawh em em tui thianghlim pek chhuah kawngah hmasawnna rahbi thar kai zel turin duhsakna a hlan a, theihtawp chhuah zel turin a chah nghal . PHE chu Deparment pawimawh tak anih angin thawktu zawng zawngte pawhin an pawimawhna leh mipui rawngbawltu an nih hre reng chunga hnathawk thin turin a chah a. Thawhhona tha a awmloh chuan sawrkar hnathawh a har thin hle tih tarlangin, thawhhona tha tak nei zel turin thawktute a fuih a.

Er. C. Lalremsiama chuan sawrkar hnathawh hi chhungkua nen thil in ang tak a ni, a ti a. Inhauh chang, infak leh inchawimawi a ngaih chang a awm thin a, chutiang hunah chuan rilru puitling tak put a tul tiin, in hmangaih leh induhsakna nen thahnem ngai taka thawk thin turin a sawm a. Christmas leh kumthar hlim taka hmang turin Siaha Division- a hnathawk zawng zawngte duhsakna a hlan nghal.

Er. Viasai Solo, Executive Engineer, Siaha Division chuan Secretary lawmna thutkhawm hi a kaihruai a. SDO - Urban leh Rural changtuten Siaha Division hmalakna tlangpui hrilhhriatna an nei nghal a. Department- in harsatna an neih te leh hmalak dan tur hrang hrangte sawihona an nei nghal bawk.