YMA Sub-Hqrs Lunglei Conference Hall-ah vawiin chawhma khan PHE Department hnuaia Communication & Capacity Development Unit-te bultumin ‘Grassroot Level Training on Water Quality Monitoring & Surveillance Programme for  Hnahthial RD Block and Lungsen RD Block’ chu buatsaih a ni a. Dr. VLMS Dawngliana, Chief Medical Officer, Lunglei chu Khuallian niin a hawng nghal a ni.

Khuallian Dr. VLMS Dawngliana chuan ramngaw kan humhalh loh chuan kan tuihna te hi a tlem tial tial dawn a, kan tuihna te a thianghlim leh a hrisel zawk nan bawlhhlawh paih leh ek thli sawngbawl kawngah kan fimkhur hle a ngai a ni, a ti a. Kalkhawmte chu an khua leh veng theuh a lo hrisel zawk nan tui thianghlim leh thianghlim lo te chik a, veng theuh turin a chah nghal a ni.

He hawnna inkhawm hi Er. C. Lalzidinga, EE (P) Lunglei Watsan Circle chuan a kaihruai a. District Laboratory Chemist Pu H.Lalchuailova chuan training an neih chhan te sawiin, Water Monitoring Cell-in District tinah laboratory a dah thu leh Sub-Division chhunga laboratory 28 a dah thu a sawi a. Sawrkar laipuiin thingtlang mite hriselna a ngaih pawimawh thu leh Village Water and Sanitation Committee leh PHE Department-a laboratory te inkarah thawhhona tha neih a tul thu a tarlang bawk a ni.

Training ah hian ‘khawtlang tui lak chungchanga PHE department hmalakna leh a enkawl zuinaa khawtlang mawhphurhna’ tih thupui hmangin Er. K. Lalhmingmawia, SDO chuan zirtirna a pe a. ‘Tui, sanitation leh hriselna inkungkaih dan’ tih thupui hmangin Dr. Lalramzauva. MBBS, FCAMS leh ‘tui ziarang leh a endik chungchang’ tih thupui hmangin Er. H. Lalchuailova, Chemist, District Laboratory ten zirtirna an pe bawk a ni.