Pu Zodintluanga, UD & PA Minister hovin vawiin khan I&PR Conference Hall-ah, New Economic Development Policy (NEDP) hnuaia Aizawl khawpui Traffic tawt lutuk tih ziawmna tura hna kal mek ‘Junction Improvement within Aizawl City’ tih chungchang sawiho a ni a. UD&PA Parliamentary Secretary Pu Hmingdailova Khiangte pawhin he hun hi a hmanpuiin, Officials leh a kaihhnawih NGO te an tel a ni.

Sawihona hi Minister Pu Zodintluanga’n kaihruaiin, inlawmna thu a sawi a, Dr. C. Vanlalramsanga, Secretary, UD&PA in sawihawnna hun a neih zawhah hmalakna tur hmun hrang hrang te Power Point Presentation hmanga inhrilhfiahin thlir ho zui a ni.

Junction Improvement atan hian kumin 2016 – 2017 chhunga hmalakna tur hmun li ruahman a ni a, hmun khat ‘Pangi Junction’ Republic veng chu zawh thawkhat tawh niin mipuiin tangkai taka hman zui mek a ni tawh nghe nghe. Hmalak belhna tur erawh tlem a la awm. Hmun dang pathum hmalak tumna te hi, (1) Millenium Junction; (2) Bawngkawn Junction leh (3) Vaivakawn to Hunthar Junction-te a ni. Henga hmalak tum dan tlangpui hi Department lamin Projector-a entirin zawhfiah ngaite in zawhfiah a inhrilhfiah a ni. Minister chuan heng ruahmanna kal lai mek bakah hian Company peng Junction pawhsiam thaturin ruahmanna thui tak kalpui a nih tawh thu a sawi.

He sawihona-ah hian, a kaihhnawih Department  UD&PA, PWD, PHED, Police (Traffic), BSNL lama hotu te an kal tha hle a, a kaihhnawih tur veng Dawrpui, Bawngkawn, Vaivakawn, Republic leh Hunthar veng atangin Local Council, YMA, MHIP, MUP te leh NGO dang te pawh an kal tha hle a ni.

Minister chuan he sawihona-a lo kalte chunga lawmthu sawina neiin Joint Meeting hi tih tawp a ni.