Phulpui Branch YMA Platinum Jubilee (1936-2011) lawmna chu vawiin khan Parliamentary Secretary pahnih Pu KS Thanga leh Lalrinmawia Ralte’n an hmanpui.

Phulpui Community Hall-a inkhawm buatsaihah hian Pu KS Thanga chuan Mizoten YMA kan nei hi a vanneih thlak a, mi hausa leh rethei inkar tizimtu leh chhiatni thatnia kan mawina leh ropuina a ni, a ti. Ei leh barah kan intodelh loh chuan a huaisen theih lo tih hriain sorkar pawhin hma nasa takin a la chho mek a, Mizoram mipuite leh YMA ngei pawhin theihtawpa thlawp turin a sawm a ni.

Pu Lalrinmawia Ralte pawhin he pawl ropui tak Mizo mipui huapzo Pathian min pek hi vawng nung zel turin tan kan lak a ngai a ni, a ti a. Hnamdangte pawhin YMA hi tanpui ngaite tanpuitu tia an hriat dan chu vawng nung zel turin a fuih bawk.

Phulpui YMA Platinum Jubilee hi Pathianni kal ta 25.9.2011 a nih avangin a lawmna hi ni 2 awh nimin atang khan khawtlangin an nei a. Hemi chhung hian ‘Tanpui Ngaite Tanpuina Bawm’ siamin thawhlawm khawn a ni.