Vawiin hian Pi Vanlalawmpuii Chawngthu bialtu MLA leh Minister of State ni bawk chuan N. Vanlaiphai Joint MHIP Conference chu khuallian niin a hman pui a. Kum 2019 YMA General Conference Organising Commitee te nen meeting an nei ho bawk.

Pi Vanlalawmpuii Chawngthu chuan, Pawl intodelh leh tanpui ngaite tanpui thintu pawl ropui Mizo hmeichhiate intel khawmna, MHIP kan nei hi kan vannei hle a. Ram leh khawtlang hruai turin mipaten min pawm chhoh deuh deuh theih nan hman tlak leh rin tlak ni tura keimahni kan inbuatsaih nasat deuh deuh a tul a ni, a ti. Politics hi eiruk zirna hmun tur leh insiam hausakna hmun tur a ni lova, midang tana rawngbawlna hmun pawimawh tak ani tih kan hriat a ngai ani, a ti bawk.

MHIP Joint Conference N.Vanlaiphaia neih hi Pi R.L. Hmangaihzuali, an pawl President in a kaihruai a, Pi Saipuii Sailo, President MHIP Headquarters leh Pi Dr. Thanpuii, Fin. Secretary MHIP Headquarter ten an hmanpui ani.

Tin, 2019 YMA General Conference Organising Committee te nena an meeting honaah Pi Vanlalawmpuii Chawngthu hian, N.Vanlaiphai khuain YMA General Conference, 2019 an dawng tur chu lawmawm a tih thu sawiin, palai lokal khawm te chu felfai taka an lo dawnsawna, engkim tha leh tlin taka kalpui a nih theih nan kan tih tur theuh te kan hlen chhuah a ngai dawn a. Tun atangin chung hnate chu kan lo thawk tan dawn a ni, a ti a. Hrangturzo bial chhung khaw hrang hrang inkalpawhna kawngpui te siamthat hna pawh thawh tan a nih tawh thu sawiin, reiloteah kan bial kawngte hi a tha chho vek dawn a ni, a ti.