Rashtriya Madhyamik Shiksha Abhiyhan(RMSA) Serchhip District buatsaihin vawiin chaw hma dar 10:30 khan “Science,Technology & Innovation for a Clean, Green and Healthy Nation” tih thupuia hmangin BNRGSK Hall, Serchhipah “Student Science Congress 2018” neih a ni a, Pu Lawmawma, District Project Co-Ordinator, RMSA Serchhip chu khuallian ani.
Khuallian chuan hawnna thu sawiin "Tunlai khawvel changkang tawh takah Science & Technology thiamna hmanga hmasawnna a nasa in, chak takin a kal mek a, ram hmasawnna hna thawhna tur atan aki pawimawh tak anih avangin sawrkarin Science subject hi a ngai pawimawh em em a ni, a ti a; zirlaite leh zirtirtute chu thiamna tak tak nei tura theihtawp chhuah zel tura fuihin, intihsiaknaa tel zawng zawngte duhsakna a hlan ani.
He hunah hian Pu Saihmingthanga Sailo, District Co-ordinator, Science Teacher’s Association Mizoram (STAM) chuan Student Science Congress buatsaih anih dan report a pe a, intihsiakna telte lawmna thu a sawi bawk.
He hunah hian Serchhip khawpui leh a chhehvela High School 5 leh Middle School 2 atangin zirlai naupang ten initihsiakna an nei a, intihsiaknaa ti tha 3 (High School Level ah 2 leh leh Middle School Level–ah 1) hian State Level Student Science Congress ah Serchhip District ai an awh dawn a ni.
