Vawiin khan MZP Hqtrs. Champhai buatsaihin HSLC leh HSSLC Examination 2018 a zirlai tithate chawimawina hun hman a ni a, he hun hi Cooperation, Sericulture leh Fisheries Department changtu Minister Pi Vanlalawmpuii  Chawngthu chuan khuallian niin a hmanpui a, Pu TT Zothansanga Champhai North bialtu MLA chuan khualzahawm niin a hmanpui bawk.

Zirlai tihtha chawimawina hun Govt Champhai College Multipurpose Hall-a neihah hian Khuallian Pi Vanlalawmpuii Chawngthu chuan thusawiin mi hlawhtling kan tihte hi thawkhleh khata hlawhtling nghal thut an awm lo va, an hlawhtlinna kawngah hian harsatna leh mangannate, lungngaihna tam tak an tawh thin thu a sawi a. Hausa leh  thawmhnaw manto neite hi mihlawhtling ber nihna anih loh thu leh hlawhtlinna chu thiam theih vang emawa neih theih a ni lova, taihmakna leh tumruhna nena beidawng lova bei tang tangte neih theih anih thu a sawi bawk.

Minister chuan lehkhathiam hna hmu lo nih hi zahna chang kan hriat a hun tawh a, lehkhathiam chuan sawrkar chauh rinchhan lovin mahni kea ding turin hna a thawk tur a ni tiin, midang kan chawm thei lo anih pawhin mahni tal kan inchawm zoin kan intodelh tur a ni, a ti a. Kut ke kim kan nei a nih chuan mahni intodelh hi kan tihmakmawh a ni a, engkim mai hi awlsam taka neih theih a nih loh avangin hlawhtling turin taihmak chhuah a ngai a ni, a ti bawk.

Zirlai kalkhawmte chu Social Media hman dan chin tawk thiam tura chahin zirlai nih chhung chuan Mobile phone te hi inbiakna atana baka hmang lo hram  tur leh Social media-a thu chi hrang hrang vawrh darh thinte hi a dik tawk leh dik tawk loh fiah thin turin a chah a. Zirlai an nih chhunga NGO a inhman dan chin tawk hriaa zirlai tibuai thei khawpa in hmang lo tur leh zirlai ngaipawimawh hmasa ber turin a chah bawk a. Mifing leh lehkhathiam apiangin nu leh pa an zahin chawimawina chang an hriat thu sawiin, nu leh pa kan hmangaihna kan lantir theihna tha ber chu kan zirlaia kan hlawhtlinnate, an thu kan awihte leh an duh kan tihhlawhtlinsak te hi a ni, a ti a.  Nun dan hmanga nu leh pate chawimawi hi chawimawina tha ber a ni, a ti bawk.

Champhaiin Zirlai titha chawimawi tur 147, School ti tha 6 leh Phd nei thar mi 6 chawimawi tur an nei chu MZP ang pawha inchhuanna tham a tlin thu a sawi a, hlawhtlinna changte bakah rim taka hnathawktu zirlai nu leh pate leh zirtirtute chu zah an phuin an thawhrimna fakawm a tih thu a sawi bawk.

Zirlai Pawl hruaitute chu Zohnahthlak unaute'n inunauna tha zawk kan neih theihna tura an hmalakna chu fakawm a tih thu sawiin, Thangchhuah kawr hak mai duh tawk lova, khawvel hriata zofate'n thang kan chhuah theihna tura theihtawp chhuah zel turin a fuih a. Politics Ball-a tang lo tura chah bawkin zirlai pawl atanga dikna leh rinawma zir chhuak turin a chah a, sawrkar tha tichak zel tura thawhpuiah a sawm a.

Champhaia hmasawnna tam tak hmuh tur a awm chu Champhai khua hmuh tinuamtu anih thu a sawi a. Nungcha humhalh a pawimawh zia pawh sawiin hmanlai chuan sa kap thei te hi pasaltha leh mi hmingtha an ni thin a, tunah chuan nungcha humhalhtute hi pasaltha dik tak an ni, a ti a. Nungcha, ramngaw leh tui hnate humhalh kawnga tan la turin zirlai kalkhawmte chu a sawm bawk a ni. 

Khualzahawm Pu TT Zothansanga Champhai North bialtu MLA pawhin thusawiin zirlai titha te chu hmun dangah pawh zirlai ti tha tak tak an chhuah nual avangin tan la leh zual turin a fuih a, hlawhtlinna tak tak chang turin kawng zawh tur tam tak an la neih avangin taihmak chhuah leh zual turin a fuih bawk. A thawkrimte chauh dinchhuahna tur khawvel a nih avangin zirlaite chu hlawhtling tura thawhrimna leh taimakna a pawimawh ber tih hre reng turin a chah a. Hna a vang tiin sawi thin mahse lehkhathiam tak tak te tan chuan India ramah exam sen loh hna a awm thu sawiin, Mizo zingah sawrkar hnathawk Officer lian kan tlem telh telh a, thiamna lama kan tlak hniam zel chuan hnam dangin min awp leh dawn a ni, a ti a. Ram hnuk khawih thama lehkha zir nasat a ngai a, ram leh hnam humhalh tura kawng tha ber pakhat chu zirna hi a ni a tiin, kan chhehvela hnam dang awmte um chhuak turin thiamna hmanga kan hneh a ngai tawh a ni, a ti bawk.

Zirlai thi tha chawimawina hunah hian Champhai District chhunga zirna In atanga HSLC Distinction-a pass 60 te leh HSSLC Distinction-a pass 7 leh First Division-a pass 80 te, HSLC za a za pass School parukte bakah PhD hmu thar mi 6 te hnenah chawimawina thilpek hlan a ni a. MZP Hqtrs. Champhai hian Khuallian, Khualzahawm leh MZP General Hqrs GS hnenah ngaihhruina thilpek an hlan bawk a ni.

He hunah hian MZP Hqtrs. Champhai Secretary  Lalthanfela hnen atangin report ngaihthlak a ni a. MZP Hqtrs. Champhai Vice President H Lalramhluna leh MZP General Hqtrs. GS Lalnunmawia Pautu hnen atangin thusawi ngaihthlak a ni bawk a. Thangdeihmanga Treasurer MZP Hqtrs. Champhai chuan lawmthu sawiin he hun hi a khar a ni.