2666/2025-2026

Aizawl, the 15th December 2025: Vawiin khan Chief Minister Conference Hall-ah Pu Vanlaldina Fanai, Commissioner & Secretary, Planning & Programme Implementation Department chuan Mizoram Statistical Handbook 2024 a tlangzarh. Naktuk atangin Economics & Statistic Directorate, GE Branch-ah Rs. 100 in a lei theih ang.

Pu Vanlaldina Fanai chuan, Economics & Statistics Department-in Statistical Handbook 2024 tha tak mai, English leh Hindi-a buatsaih kan tlangzarh thei hi lawmawm ka ti a. He HandBook buatsaih tura in hahzia hi ka hriatpui che u avangin lawmthu ka hrilh che u a ni. Data dik leh rintlak neih hi hmasawnna hnathawh kawng tinrengah a pawimawh a, vawiina kan data thar pawh hi kan chhawr tangkai hle ang. Handbook chhuah loh kumah Abstract tihchhuah zel a nih avangin kum tinin data hi kan update zel dawn a. Data tha zawk leh kimchang zawk nei turin kan inpuahchah sauh sauh dawn nia, tiin a chah a ni.

Pi Lalhmangaihsangi Ralte, Assistant Director, Economics & Statistics chuan Technical report a pe a, Statistical Handbook 2024-ah hian Central leh State Department hrang hrang, Private company, NGO, Kohhran, Financial Institution leh Official Report atangte-a data lakkhawmte dah a ni a. Kuminah hian a tum hnih nan tawng chi hnih, Hindi leh English-a buatsaih a ni.

Inkhawm kaihruaitu Pu B. Lalrinhlua, Director, Economics & Statistics chuan, Statistics hi inchirhthehna tura siam a ni lo va, ram hmasawnna ruhrel buatsaih nana hman tur data a ni. Publication release khawtlai thin chhan hi Department, NGO leh company ten statistical data min pek tlai thin vang a ni a. Za-a 50 (50%) aia tam hi a huna data min pe thei lo, keimahnin reminder letter, telephone call leh Office-a luhchhuaha kan dil chhuah an ni. Tun tuma publication a chhuah tlai chhan pawh company 2 leh Department pakhat data kan hmu thei lo va, kan dil thlawn rei deuh a, kan telh ta lo nghe nghe a ni, a ti.

Handbook hi kan ram hruaitute leh sawrkar Department hrang hrangin ram hmasawnna hna an thawhna kawngah te, zirlai leh hna zawng mek te, research ti mek te, tourist leh mipui ten tangkai taka an hman atana buatsaih a ni a. [Technical Report hi Press Release ah hian thiltel (attach) a ni]

Pu H. Lalnunzuala, Deputy Director, Economics & Statistics chuan lawmthu sawiin tlangzarh inkhawm hi a khar a ni.

Statistical Handbook 2024 Technical Report Mizo.docx