Vawiin chawhma dar 10:30 khan Directorate of Science & Technology bul tumin Planning Minister Pu Lalsawta office chamber-ah kumin 2015 National Science Day hman a ni a, kumina thupui chu “Science - ram leh hnam dinchhuahna”, tih hman a ni. National Science Day pualin ni 28.2.2015 (Inrinni) hian Beraw tlanga Science Centre hi a duh apiangte tan a thlawna tlawh theih a nih thu Minister hian a puang nghal a ni.
Minister chuan thusawiin tunlai khawvelah science & technology chu a thang zel a, ram changkang leh hmasawn apiangte chu Science leh Technology-a hmasawn ram an ni zel a ni, a ti. India ram pawh vansang lam thiamna mai nilovin Nuclear hmang tangkai thiam ram a lo ni ta a. Mizoram-ah pawh Science leh Technology lamah hma chak taka lak chhoh mek a ni tiin tunah phei chuan Science & Technology Directorate hial kan lo nei ve ta chu lawmawm a tih thu a tarlang. Science lama Mizo te min tithangharh zel turin Aizawl-ah Science Centre din a ni tawh a, ram leilung hausakna haichhuaka tangkai taka hmang tur leh ruahmanna tha - Scientific based Plan nei turin Mizoram Remote Sensing Application Centre (MIRSAC) chuan hna a thawh mek thu te a sawi lang bawk. Mizoramin hma a sawn zel theih nan kawng hrang hrangin zirbingna - Research a kalpui mek bawk a. Tunah hian Science leh Technology hnuaiah thil hmuhchhuahte neitu nihna vawnhim sakna - Patent Information Centre kalpui mek a ni tawh bawk. Science leh Technology tel lovin hmasawnna tluantling a neih theih lo va, chuvangin, ram leh hnam hmasawnna leh dinchhuahna atan Science leh Technology thiamna te chu hmang tangkai deuh deuh turin kalkhawm te chu a chah bawk a ni.
He National Science Day hmanna inkhawm kaihruaitu Dr. Vanlalzara, Chief Scientific Officer, Directorate of Science & Technology chuan National Science Day chu kum 1986 atanga kum tin hman a nih thu leh, thupui hrang hrang neia hman a nih dan te a sawifiah a. Kumina thupui chu “Science for nation building” tih hman a ni a. He ni hi kumtin February ni 28-ah hman a ni thin a, he ni hi Science thiamnain ram hmasawnna a thlen dan inhrilh hriatna atan hman thin a nih thu a sawi bawk.
He inkhawm kharnaa lawmthu sawitu Dr. R.K.Lallianthanga, Principal Scientific Officer leh Project Director (MIRSAC) chuan kumin 2015 ah chuan National Science Day ni tak hi Inrinni a nih avangin vawiin ni 27 hian Minister hovin hman a nih thu a sawi a. A ni tak, ni 28.2.2015 (Inrinni) ah Planning Secretary Dr. C.Vanlalramsanga hovin Science Centre tlawh a nih dawn thu a sawi a.
He National Science Day hmanna inkhawmah hian Planning Secretary Dr C.Vanlalramsanga, IES leh ICT Secretary Pu C.Lalhmachhuana, ITS te bakah Mizoram Science Society, Mizoram Academy of Sciences, Mizoram Mathematics Society leh Science Teachers Association of Mizoram hotute thahnem tak an tel a. Directorate of Science & Technology Officer leh staff te, MIRSAC Scientist leh staff te leh Mizoram Council of Science & Technology-a Officer te leh staff te an tel bawk a ni.
