Agriculture Technology Management Agency (ATMA), Serchhip Distict buatsaih nihnih awh District Level Exhibition (Kissan Melas) chu Serchhip Bazar chungah vawiin chawhnu dar 2:00 khan khar a ni a, kharna inkhawm hi Serchhip Bawrhsap, District ATMA Governing Board Chairman ni bawk Pi Juhi Mukherjee, IAS in a hmanpui a ni.

Kharna inkhawma thusawitu District Bawrhsap chuan Exhibition hlawhtlinna tura Stall siamtu Department hrang hrangte thawhrimna leh inpekna fakawm a tih thu leh Stall hrang hranga bungrua leh thlai thar thawhtu loneitu leh kuthnathawktute thawhrimzia chu fakawm a tih thu a sawi a, Serchhip District-a kuthnathawktute taimakna a tarlang chiang hle a a hriat thu a sawi bawk. Bawrhsap chuan kuthnathawktute hamthatna tura chak taka Serchhip District chhunga hma lak ani chuan rah tha a chhuah tan a ni a ti a, Department hrang hrangte bakah Aizawl, Serchhip, North Vanlaiphai leh Baktawng atanga mimal/kuthnathawktu Stall hrang hrang siamtute chungah lawmthu a sawi bawk a ni.

He Exhibition ah hian Agriculture & Allied Department hrang hrang pasarih - Agriculture, Horticulture, Fisheries, Industries, AH&Vety, Sericulture, Soil & Water Conservation ten Stall (Dawr) siamin, anmahni Department hnuaia kuthnathawktute thlai thar chi hrang hrang leh thil thar dangte bakah kuthnathawktu ten thlai an enkawlna atana pawimawh damdawi leh khawl chi hrang hrang pho chhuah a ni a, an ni bakah mimal leh pawl hrang hrang engemaw zatin Stall hi an siam ve bawk a ni.

Kum kalta chhunga Serchhip District a RD Block pahnih - Serchhip leh East Lungdar atanga ATMA Best Farmers leh Best Farmers’ Interest Group thlanchhuahte hnenah lawmman sem a ni a, Best farmers lawmman hi mi 10 in dawngin tangkafai Rs. 10,000/- theuh leh citation an dawng a, Best Farmers’ Interest Group thlanchhuah pahnih te hian tangkafai Rs. 20,000/- ve ve leh citation an dawng a, District Bawrhsapin lawmman te hi a hlan a ni. Lawmman dawngtute chu :-

BEST FARMERS

Serchhip R.D. Block atangin :

1. Lalhlimpuia s/o Rochhinga - Horticulture

2. K. Lalchhuanawma s/o Chuailova - Sericulture

3. C. Vanlalhruaia s/o Kapthanga - Fisheries

4. Lalthazuali w/o F. Lalthanmawia - AH & Vety

5. Zonundangi w/o Laldingliana - Soil & Water Conservation

6. Chhunkhhuma s/o Hrangkunga - Agriculture

East Lungdar RD Block atangin :

1. Thawngbawia s/o Chhawngnanga - Horticulture

2. Lalsangliana s/o Vungkawla - Fisheries

3. Thawngbawia s/o Chhawngnanga - Soil & Water Conservation

4. Lianhnuna s/o Tlangchhuana - Agriculture

BEST FARMERS INTEREST GROUP

Serchhip R.D. Block atangin : Rubber Grower Group, Serchhip

East Lungdar RD Block atangin : Poultry Rearing Group-I, North Vanlaiphai

He Exhibition ah hian Best Stall thlan niin, King & Queen of the show pawh thlan a ni bawk a, hetiang hian lawmman siam sak an ni bawk-

Best Stall

1st Prize - Fisheries Department. (Rs. 3,000/-)

2nd Prize - Horticulture Department. (Rs. 2,000/-)

3rd Prize - Agriculture Department. (Rs. 1,500/-)

King of the Show - Turkey (Sai ar) (Rs. 1,000/-)

Queen of the Show - Sangha (Cyprinus carpio) (Rs. 1,000/-)

Vawiin District-Level ATMA Exhibition kharna inkhawm hi Pu James Lalsiamliana, DAO, ATMA Project Director, Serchhip District ni bawkin a kaihruai a, Pu V.L. Hmangaihchhunga, SMS, ATMA in Technical Report pe in Pi Rosy Lalmuansangi, ASCO in lawmthu sawina hmangin hnu a khar a ni. District-Level ATMA Exhibition buatsaihna leh lawmman hrang hrang atan hian Rs. 3,00,000/- sen ral a ni.