Vawiin chawhnu khan Planning Minister Pu Lalsawta hovin sawhthing chingtuten an sawhthing tharchhuahte an hralh chhuah zung zung theihna atan ruahmanna  siam a ni a. Meeting-ah hian sawhthing chingtuten harsatna an tawh hrang hrang chipchiar taka sawi ho niin an harsatna sutkian a nih theihna atan ruahmanna siam nghal a ni a, he ruahmanna hi rang taka hman nghal tura rel a ni bawk.

Sawhthing hralhna tanpui turin Primary Agriculture Credit Societies (PACS) 23 ten chak takin hma la se tiin rel a ni a. Mizoram Agricultural Marketing Solution (MAMSOL) te, Aggregator leh Entrepreneur ten awlsam zawka sawhthing hralhna an buatsaih theih nan revolving fund hman ni se tiin  an rel a. Hemi ruahmanna chak taka enkawl a, hma la tur hian Technical Committee din a ni ang.

He meeting-ah hian Mizoram State Planning Board Vice Chairman Pu H. Liansailova , Planning Secretary Dr. C. Vanlalramsanga, Commerce & Industries Secretary Pu Zothan Khuma, Horticulture Secretary Pu Sawihlira, Mizoram Cooperative Apex Bank Chairman Pi Lalmuanpuii, Finance Department , Planning Department , Commerce & Industries Department,  Horticulture Department, Agriculture Department hnathawkte bakah Mizoram Agriculture Crops Growers and Marketing Society (MACGAMS) Chairman leh Secretary te, Mizoram Entrepreneurship Network leh Zospice International hotute an tel a ni.