Vawiin khan Planning Minister Pu Lalsawta chuan Economics and Statistics Directorate a tlawh a, thawktute nen inkawmhona hun an hmang. Minister hi Planning Secretary Dr. C. Vanlalramsanga’n a tawiawm a ni.

Minister chuan Economics & Statistics Department chu hna pawimawh tak thawk a, Central sawrkar nen nghet taka inthlungzawm an nih thu a sawi a. Hna an thawh that thu leh, State dangte nen khaikhin pawha thawk tha ber pawl an ni chu fakawm a ti bawk. Pu Lalsawta chuan chak leh hlawk zawka hna thawk tur chuan kalphung thlak danglam a tul thin thu sawiin, thil tha zawk turah chuan rilru inhawng taka tih dan thar te dawn sawn thiam a pawimawh a ni, a ti a. Department kalphung ah emaw ram inrelbawl naah pawh ‘change’ hi a tul fo thin a ni, a ti a. Mizoramin ei leh bar hmasawnna kawng a zawh mekah pawh sorkar hmalakna thar New Economic Development Policy hnuaiah pawh mi taima leh mi thiam, state pawn thleng hial thei tura eizawnna kawng tha dap thiam leh remhriate chu sorkarin a puih tum te an nih thu a sawi bawk.

Vawiina thawktute nen inkawmhona hun hi Economics and Statistics Director Pu Lalchhuanawma Hrahsel in a kaihruai a, an department hnathawh dan kalphung leh hmalakna te chipchiar takin a tarlang a. Department thawktute harsatna leh hmalak ngaih nate sawihona hun Minister ho hian hman chhunzawm a ni.