Vawiin chawhma khan Economics & Statistics Conference Hall-ah Planning Minister Pu Lalsawta'n 'Socio-Economic Development & Planning in Mizoram during the Five Year Plan Period' lehkhabu a tlangzarh a. Economics & Statistics Department Director Pu Lalchhuanawma Hrahsel buatsaih a ni.

Khuallian Pu Lalsawta chuan 'Socio-Economic Development & Planning in Mizoram during the Five Year Plan Period' lehkhabu chu buatsaih hautak em em a nih thu sawiin tlangzarh a ni chu lawmawm a tih thu a sawi a. Document hrang hrang kum 30 kal ta ami lakkhawm a ngai a, felfai taka dahkhawm niin Mizoram socio-economic development history bu tha leh hlu tak a ni, a ti a. Ram economy pawimawhna hrang hrang a tarlang a. Lehkhabu atang hian sawrkarin kum tin enge an tum bera, eng lam hawi nge an ngaih pawimawh thin a lang chiang hle a ni tiin lehkhabu zir tham a ni, a ti a. Mizoram lo than chhoh dan hre duh leh zirchiang duh tan lehkhabu pawimawh tak a ni, a ti a. Kan ram economy ngaihtuahin zawi zawiin kan thang chho ve zel a, tun hnaiah NEDP hmangin hmalak a ni a, hemi hnuaiah hian kawng hrang hrangin hma kan sawn a ni, a ti a.    

'Socio-Economic Development & Planning in Mizoram during the Five Year Plan Period' lehkhabu-ah hian document hrang hrang rawn chungin Mizoram Union Territory (UT) a nih hunlai atanga tunhnai thlenga Mizoram Socio-economic dinhmun kimchang thei ang berin tarlan a ni a. Lehkhabu hi Section nga (5) a then niin kum 1972 (4^th Five Year Plan) atanga kum 2012 (12^th Five Year Plan) chhunga Mizoram dinhmun tarlan a ni. Sawrkar department hrang hrang kum 45 chhunga an hmachhawp leh hmalaknate ziaka dah a ni a. A tihchianna turin statistical data pawh tam thei ang ber dah a ni. Lehkhabu hi phek 606 a chhah a ni a, Mizoram Statistical Development Agency chhut a ni. Research scholar lo la awm zel tur te, Mizoram socio-economic dinhmun lam zir chiang duh tan lehkhabu rawn tlak tura ngaih a ni.

Economics & Statistic Department Jt. Director Pu Lalbiaksanga chuan kalkhawmte lawmna thu a sawi a. Hetiang ang lehkhabu pawimawh, kan ram economy chungchang tarlanna hi Mizoramah a vang hle a, plan period tam tak chhunga Mizoram sawrkar hnathawhna tur eng ang zawngin nge an kalpui tih chiang takin a lang a ni, a ti a.  Planning Secretary  Dr.C Vanlalramsanga chuan lehkhabu sawizauna hun a nei a. MZU Economics Department Asst. Professor Dr. James LT Thanga atangin analytical comment ngaihthlak a ni a. Economics & Statistics Department Director Pu Lalchhuanawma chuan lehkhabu buatsaih a nih dan leh a tangkaina te a tarlang a. Economics & Statistics Department Dy. Director Pu B. Lalrinhlua chuan lawmthu sawina in hun a khar a ni. Department hrang hrang hotute, mi thiam (academician) te an tel a. Lehkhabu hi Directorate of Economics & Statistics office-ah lei tur a awm reng a ni.