Civil Registration of Births & Deaths Mizoram-a a kalphung enkawltu committee sang ber Inter Departmental Coordination Committee (IDCC) chu nimin khan Secretary (Planning Dept.) leh Chief Registrar of Births & Deaths ni bawk Dr.C.Vanlalramsanga hovin Aijal Club-ah meeting pawimawh tak an nei.

Mizoram-a Birth & Death Registration kalphung thlirho ngai leh siamthat ngai laite sawiho leh ngaihtuah ho a ni a. Mizoramah misual tute emaw avanga Birth Certificate dik lo leh dan lo anga neih hmuh tur leh man tur a awm leh fo thin hi engtia tireh tur nge ni ang tih sawiho a ni. Certificate danglam bik a lem siam theih mai mai loh hman ni tawh se, Certificate nei tawh zawng zawng pawh thlak sak veka that a rinawm thu sawiho a ni bawk a. Hetianga tih hi hun duh rei deuh hlek tur leh sum tam tak ngai tur mah nise a thuphunga rem tih tlan niin sorkarah rawtnate pawh la thlen nise tih a ni.

Birth Certificate leh Death Certificate hi dan dik lo hmanga neih tum kawngah mipuite pawh fimkhur a tul thu leh thawktute pawh an fimkhur lehzual dan turte leh Certificate lem dan lo anga neitute leh a lo pechhuaktute chu dan anga hrem zel a pawimawh thu sawi a ni bawk.

Mitthi tana Death Certificate pawh rokhawm chungchangah leh thildang atana document pawimawh a nih avangin a dawng leh la chhuaktu tur dik tak hnena pekchhuah a nih theih nan khauh zawka kalpui a nih theih nan mitthi register theih dan leh kaihhruaina pawh siam remtih a ni.

Birth Certificate-a hming tidanglam duhte tan pawh kalphung pangai Affidavit siam a Judicial Magistrate-in an hriatpuina tel lo chuan pawm loh nise tih chu kalpui zel tha he Committee hian a ti bawk.