RD Department, Khawzawl leh PHE Sub-Division, Khawzawl tangkawp bultumin vawiin khan Swachhata Hi Seva hnuaiah Presbyterian English School, Khawzawl zirlaite tan Plastic Free Campaign buatsaih a ni.

Plastic Free Campaign, PES Khawzawl zirlaite tana buatsaih hi Pu Lalbiakthuama, UDC, BDO Office, Khawzawl in kaihruaiin Pu Lalnunfela, SDO, PHED, Khawzawl in Plastic that lohzia hi zirlaite hnenah a sawi a. Pu Lalnunfela chuan Plastic hi thil tawih ral mai thei lo anih vangte, Plastic thenkhat siamnaah mihring te tana tur hlauhawm tak tak hman tel anih vang te in mihringte tan leh kan chenna leilung tan hian Plastic hian that lohna tam tak a nei a ni a ti a, Plastic chu ram changkang zawkah te an khap hnuah tunah hian Mizoram khawpui ber Aizawlah pawh khap a ni tan ta a, Khawzawlah pawh Plastic that lohna hriaa hmalak chhoh a tul tih sawiin Plastic hmanga thil siam te kan hman tlem a, Plastic aiah thildang tawih ral thei te kan hman uar a tul a ni a ti a. Plastic kan hman tlem deuh deuh theihna turin zirlai naupangte chu Plastic hlauhawmzia hre turin leh Plastic hlauhawmzia hi an chhungte leh an thiante hnenah te sawi tam turin zirlai kalkhawmte chu a chah a ni.