Nimin tlai dar 3:00 khan Pradhan Mantri Awas Yojona (PMAY) – Housing for All (Urban) hnuaia tanpuina diltute enfiah hna thawktu District Screening Committee chu a tum hnihna atan DC Conference Hall Serchhipa-ah an thukhawm, Hrangturzo bialtu MLA Pi Vanlalawmpuii Chawngthu leh Tuikum Bialtu MLA Er. Lalrinawma ten he meeting hi an tel pui.

Chairman Dr. Lalrozama, IAS, Deputy Commissioner kaihhruai meeting-ah hian Tuikum bialtu MLA Er. Lalrinawma chuan fimkhur taka ngaihtuahna hman a tul a tih thu sawiin, miretheite tana he scheme hi ruahman anih ang ngeiin a dawng tur dik tak ten dawng vek se a duh thu a sawi a. Pi Vanlalawmpuii Chawngthu pawhin duhsak bik leh Party thliar bik awm hauh lova, a mamawh leh dawng tlak ngei ten he tanpuina hi dawng ngei se a duh thu a sawi bawk.

PMAY hnuaia scheme Befeficiary-Led Construction (BLC) hnuaiah hian diltu mi 1560 awm in, heng mite hi a hmunah kalin dawng tlak leh dawng thei an ni em tih enfiah vek an nih hnuah, dawng tlak nia ngaihte chu State Level thuneitute hnena thawn tura pawm a ni a. Scheme dang Credit Linked Subsidy Scheme (CLSS) bikah hian diltu mi 424 an awm a, heng diltute atang hian kumin chhungin a dawng thei tur mi 60 thlan chhuah an ni dawn a ni. He scheme hi kum tin a thara chhawpchhuah zel tur a ni ang. Tanpuina dawngtu tur te lo thlang chhuaka, a tula anga hma la chhunzawm turin UD&PA Serchhip leh Bank hotute chu Committee chuan a ruat nghala, inkaihhruaina mila, enfiah ngaite pawh enfiah tura tih an ni bawk.

District tina tanpuina dawng tura thlan chhuahte hi Central Sanctioning & Monitoring Committee in a lo ennawn leh ang a, pawm tlak nia a ngaih chuan hma lakna tur atan tanpuina pawisa a pe dawn a ni.

He meetingah hian Member Secretary Pu Lalfakawma Chhakchhuak, DLAO Serchhip, Bank hrang hrang Manager, Manager & Staff UD&PA leh Joint Village Council President te an tel a ni.

Attachment

  • Loading attachment...