2119/2025-2026

Dated Aizawl, the 31st October, 2025: Vawiin khan Urban Development & Poverty Alleviation Department huaihawtin ‘Angikaar Campaign’ kharna hun Lammual-ah hman a ni a. He hunah hian Aizawl DC Er. Lalhriatpui chu khuallian niin, UD&PA Director Pu Jacob Lalawmpuia chuan hun a kaihruai a ni.

Khuallian Er. Lalhriatpuia chuan mi thiamte sawi danin mihringte mamawh (basic needs) zingah chenna in neih chu thil pawimawh berte zinga mi a nih thu leh mi tinin chenna in an neih theuh hi United Nations’ Sustainable Development Goals zingah a tel tih a tarlang a. Sawrkar laipui hmalakna Act East Policy hnuaia kan ramin Southeast Asia ramte nena inpawhna tha zawk kan neih theih nan Mizoram hi kawtchhuah pawimawh tak a ni tih a sawi a. Kum 2047-a ram changkang ‘Vikshit Bharat’ (Developed India) dinhmun thleng tur chuan mi tinin chenna in tha an neih theuh a pawimawh thu sawiin chumi tihlawhtling tura sawrkar laipui scheme PMAY-U Housing for all chu Mizorama tha taka 2016 atanga kalpui a ni chu lawmawm a tih thu a sawi a. Khuallian chuan Rinkson Entertainment siam PMAY-Urban Awareness video leh Faith Pictures siam PMAY-U Mission documentary-te a tlangzarh nghal a, Lammual-a Saras Fair leh SHG Mela stall-te a fang bawk a ni.

Hun kaihruaitu Pu Jacob Lalawmpuia chuan Angikaar Campaign chungchang sawifiahna neiin, PMAY-U hnuaia insak mekte sak zawh thuai te, geo-tagging hmanga insak endikte leh tanpuina dawng turten pawisa an dawn zung zung theih nan he campaign hmang hian beihpui thlak mek a ni a, thahnemngai lehzuala kalpui zel tur a nih thu a sawi a ni.

Vawiin hunah hian Pi Zarzokimi, Joint Secretary, UD&PA leh official dangte an tel a. Pu Albert Vanlalliantluanga, Deputy Director (P), UD&PA hnen atangin Angikaar Campaign report ngaihthlak a ni a. Pu R.L. Zidinga, Joint Director (P), UD&PA chuan lawmthu sawiin hun a khar a ni.

He hunah hian ‘State Level Best House Construction’ lawmman chu in sa tha ber mi pathumte hnenah pek a ni a. Lawmman dawngtute chu -

1.    Pu Liandailova, Champhai

2.    Pu Lalfamkima, Saitual

3.    Pu Lalrengpuia, Khawzawl

Painting Competition on PMAY-U a lemziak tha ber a hnuaia tarlan mi pathumte hnenah lawmman hlan a ni bawk - 

1.    Pu Benjamin Lalduhsaka, Saikhamakawn

2.    Stephen Ramdinthara Sailo, Carolyn Elementary School, Thakthing

3.    K. Lalruatfela, St. Mary’s School, Electric Veng