4324/2024-2025

Dated Kolasib the 18th February, 2025 : Vawiin chawhnu dar khan Govt. Kolasib College Auditorium-ah Prime Minister's Employment Generation Programme (PMEGP) Awareness Campaign neih a ni a. He hunah hian Kolasib Deputy Commissioner Pu Robert. C. Lalhmangaiha chu khuallian niin hun a hmanpui.

He hun hi Khadi & Village Industries Commission (KVIC), Entrepreneurship & Knowledge Cell of Government Kolasib College-te leh District Industry Center, Commerce and Industries te buatsaih niin, PMEGP hnuaia Sawrkarin mipuite tana hmachhawp a neih leh hamthatna awmte inzirtirna hun atan hman a ni.

He huna khuallian Kolasib DC Pu Robert C. Lalhmangaiha chuan thusawiin Sawrkar laipui chuan India ram mipuite an thiamna leh theihna tangkai taka an hman a, eizawnna tha tak neih tir hi a tum niin, he PMEGP Scheme pawh hi chumi rilru pu chunga duan a nih thu a sawi a. Sawrkar hna in mi zawng zawng a daih loh thu he hunah hian sawiin mahni hnathawh kawnga intodelhna chu ram hmasawnna kawng a nih thu a sawi.

DC chuan Sawrkar pawhin mipuite an intodelh theihna turin kawng hrang hranga thawkin, hemi kawngah hian mipuite tanpui turin a in hawn reng a ni, a ti a. Mimal intodelhna hna bakah midangte tana hnathawh tur siamsak chu he PMEGP Scheme hian a kawh tum a nih thu sawiin hetiang kawnga midangte hrilhhria a kawhhmuhtu ni zel turin he huna kalkhawmte chu fuihna thu a chah nghal bawk a ni.

Pu Nilimesh Sarkar, KVIC Executive chuan he hunah hian PMEGP sawizauna leh he Scheme hnuaia inkaihhruaina awmte Powerpoint Presentation hmangin zirtirna a pe a. PMEGP chu India Sawrkar laipuiin ram chhung mite kutkawih thiamna hmanga eizawnna tha an neiha, ram chhungah hna thawh tur tam zawk a awm theih nana Scheme siam a nih thu a tarlang bawk.

Pu PC. Lalnunpuia, Lead Bank Manager, Kolasib District chuan Banking Awareness he hunah hian pein PMEGP hnuaia Bank ten Loan an pekchhuah dante sawizauna hun a hmang a ni. He Awareness Campaign-ah hian PMEGP Beneficiaries-te hnen atangin PMEGP atanga an hlawhtlinna chanchinte ngaihthlakna hun neih a ni bawk.