2896/2022-2023
Aizawl the 1st December 2022 : Directorate of SCERT chuan ni 1 December 2022 chawhma dar 11 khan SCERT Auditorium-ah ‘Poetry Festival’ intihsiaka ti tha te leh ‘Proficiency Award in English’ dawngtute bakah National Talent Search (NTS) exam-a tlingte hnenah lawmman semna hun neih a ni a, Dr. L. Thangmawia, Vice Chairman, Human Resource Development Board chu Khuallian niin he hun hi a hmanpui.

Dr. L. Thangmawia chuan “English pawimawhna a sawi rualin kan hnam tawng pawh hnualsuat lo turin zirlaite a fuih a, kan hnam tawng leh International tawng English hi kan tankawp tir thiam a ngai niin a sawi. Tin, zirna atana ICT hman tangkai pawimawh zia sawiin mitinin kan hum kan Mobile phone te hi subject hrang hrang zirna atan leh zirtirna a tan tun aia tangkai leh zuala hmang turin zirtirtu leh zirlaite a fuih bawk.

‘Poetry Festival’ hi Higher Secondary School zirlaite tan kum 2011 atang khan buatsaih thin a ni a. He ‘on-the-spot’ poetry writing competition November Ni 30, 2022 a neihah hian school 9 atangin zirlai 46 an tel a, saptawngin poem tha tak tak ziakin inelna an nei a ni. Heta a ti tha pathumte chu:

1st Prize : C. Laltlanhlua, Class XII (Arts)
Govt. Mizo Higher Secondary School, Aizawl
Poem : The Uncertain Future
2nd Prize : Lalrinhlui, Class XI (Science)
Govt. Mizo Higher Secondary School, Aizawl
Poem : There
3rd Prize : Miriam Lalruatpuii, Class XI (Arts)
Govt. Chaltlang Higher Secondary School, Aizawl.
Poem : A Gaze on to the future.

te an ni a. Lawmman hian Trophy, Certificate leh pawisa a keng tel a ni.

He Poetry Festival-ah hian Zirlai English subject a titha te hnenah ‘Proficiency Award in English’ lawmman sem nghal a ni a, hei hi Pawl 10 leh 12 Board Exam-a English subject-a mark hmu sang Top Three-te hnenah hlan thin a ni a, tun kum 2022-ah hian Pawl 10 zirlai 24 leh Pawl 12 zirlai 24 ten he award hi an dawng a ni.

National Talent Search Exam hi India ramah kumtin buatsaih thin a ni a, Mizo naupang te pawh tel thinin seat 50 kan nei thin a, 2021 ah khan naupang 50 ten exam pe in heta tang hian mi 4 in scholarship hi an dawng ve a ni. He scholarship dawngtu zirlaite chuan lehkha an zir chhungin thlatin sumfai an dawng thin a, Pawl 11 an zir chhungin thlatin Rs. 1250/- dawng thinin, an pawl san chhoh dan ang zelin an scholarship hi a pung ve zel a ni. Kum 2021 NTS exam-naa Scholarship dawngtu zirlai te chu:-
Lalpekhlui Renthlei, St. Paul’s Hr. Secondary School, Tlangnuam
K. Lalhriatzuali, Baptist Hr. Secondary School, Serkawn
Lalhriatpuii Pachuau, Baptist Hr. Secondary School, Serkawn
Lalliansanga, ARR-ELLS School, Chaltlang.

He hunah hian Dr. Lalzirmawia Chhangte, Secretary, School Education Department chu Khual Zahawm niin, Pi Laldawngliani, Director, SCERT in programme a kaihruai a ni.