2897/2022-2023
Dated Serchhip, the 1st December, 2022: Vawiin khan Thentlang khawtlang chuan an khaw kum 50 tlin lawmna (Golden Jubilee, 1972-2022) an buatsaih a, Er. Lalrinawma, Dy. Speaker leh Tuikum Bialtu MLA ni bawk chu khuallian a ni.

Jubilee lungphun a hawn zawhah Darpawngi Hall a a lawmna inkhawmah khuallian Er.Lalrinawma chuan, Thentlang khuain kum 50 lawm thei khawpa malsawmna a dawng chu lawmawm a tih thu sawiin, Thentlang khua a lo cheng tawh zawng zawngte leh vawiina kal khawm mipuite Jubilee chibai a buk a. Khaw lungrual leh hlun tak ni zui zel turin duhsakna a hlan bawk. Dy. Speaker chuan, Mizote hi mahni khawbu zawl leh hmun hlui ngaina tak hnam kan ni a, thenawm khawveng kan inpui tawn nasain kan intlawh pawh nasain mahni pian leh murna khua ngaina tak vek kan ni. Chuvang chuan Aizawl leh khawpui dangah pawh Khaw chhuak Welfare pawl tam tak kan neih phah a, kan intanpuia, thil tha tizel tura kan insuihkhawm nan Welfare te hian nasa takin hna pawh an thawk thin a, a lawmawm hle a ni. Mahni khua kan ngainatna hian a tihhmasawn zel duhna pawh min pe deuh deuh se, sawrkarin hmasawnna a tana kut a rawn thlak tinrengah a neitu rilru pua, vawnhim ngai chite tha taka vawnghima, lo thawhpui a tulna chiah te leh kan lo tih ve theih kawng tinrengah khawtlang tana lo thawk ve zel turin ka ngen cheu a ni, a ti.

Khualzahawm Pu Lalhmachhuana, MCS, Director, Social Audit Unit, MISSAAT pawhin thu sawina neiin Thentlang Golden Jubilee Souvenir a tlangzarh a ni. Ani hi Thentlang khaw chhuak MCS hmasa ber leh awm chhun a ni.

Jubilee lawmna inkhawm hi Pu Lalsiamliana, VCP in kaihruaiin, Rev. Robawia'n hunserh a hmang a, Pu Lalsangzuala, VC Secretary chuan Thentlang chanchin tlangpui sawina a nei a, Pu Lalhmingthanga, Ogranising Committee Member in lawmthu sawina a nei bawk.

Thentlang khuaah hian in 164 awm mekin mihring 821 an cheng mek a. Zirna in hi High School thleng a awm a. Darpawngi Hall a Jubilee lawmnaah hian khawtlang mipuite an kal tha hle a ni.