Mizoram English Literary Society (MIELS) buatsaih 2nd Inter College Poetry Writing Competition neih zawh takah vawiin khan Pachhunga University Collelge-ah lawmman semna neih a ni a. Hetah hian PWD Minister Pu Lal Thanzara chu khuallian niin intihsiakna a tithate hnenah lawmman a sem.

Pu Lal Thanzara chuan tunlai khawvel changkang tawh takah ennawm hmuh tur leh ngaihthlak tur a tam a, thuziak chhiar hlutna hre phalo thalai tam tak an awm tawh laiin English poetry inphuahsiak a tel tur zirlai engemawzat an awm chu lawmawm a ti a. MIELS te’n College zirlaite inelna Poetry inphuahsiak an buatsaih chu thu leh hla tihhauhsakna kawngah thil tangkai tak a ni, a ti. Minister chuan mi zawng zawng tih ve theih loh Pathianin talent tha tak a pek thu leh hla ziak thiam mite chu lawmman leh chawimawina hmuh beiseina piahlamah thuziak kawnga anmahni tihausa zual zel tur leh Mizo literature pawhin hma a sawn theihna tur thil tangkai a nih hria a an talent tipung sauh sauh turin a fuih a. A ziak thiam ve lote tan pawh mifingte thuziak chhiar tam hi hriatzauna leh finna ril tak tak chharchhuahna hmanrua a ni, a ti. Thuziak hmangin tute pawh hian mahni duhzawng leh ngaihdan puangchhuak turin zalenna an nei theuh va, amaherawhchu ngunhnam aia thiltithei zawk tia an sawi thin thuziak hian thil tha tam tak thlen thei mahse buaina leh harsatna chawkchhuaktu a ni ve thei fo tih erawh hre reng turin Minister Pu Lal Thanzara chuan kalkhawmte a chah a ni.

Poetry inphuahsiak hi PHE Department te nen tangkawpa buatsaih niin thupui (theme)-ah ‘Clean and healthy Mizoram’,’ Preservation of water resources’ leh ‘Clean hands, healthy children’ tih te hman a ni a. Aizawl khawpui chhunga college pariat leh Serchhip college atangin zirlai 25 an tel. Malsawma, Government Aizawl College zirlai chuan lawmman pakhatna la in trophy, certificate leh pawisafai cheng 10,000 a dawng a, lawmman pahnihna la tu Shirley Lalrinfeli, Pachhunga University College zirlai chuan trophy, certificate leh cheng 7000 dawngin lawmman pathumna latu Lalhmangaihi, Government Hrangbana College zirlai chuan trophy, certificate leh cheng 5000 a dawng a ni.

MIELS hi 2012, September 4 a din niin an pawl hian Mizo te zingah saptawnga thuziak chawisan an tum a. Mizo hnam zia, ngaihtuahna leh suangtuahna te hi sap tawnga ziak a awm loh chuan hnam dang tan heng kan hnam ro hlu tak hi hriat ngaihna a awm dawnlo nia hriain chutiang ti tur chuan he pawl hi din a ni.