Vawiin khan Mizoram DGP Pu Alok Kumar Verma IPS chuan Mizoram Police Subsidiary Canteen thar chu Ist Bn. MAP Hqrs., Armed Vengah a hawng.

Pu Alok Kumar Verma chuan CSD Canteen, Mizoram Police tanglai te leh an chhungte bakah pension tawh te pawhin bazar aia man man zawka nitin mamawh thil chi hrang hrang lei theihna tur a vawikhatna atana hawn a ni ta chu lawmawm a tih thu a sawi a. A dawrtu tur ten an mamawh a zir zelin bungrua chi hrang hrang lak khawm a nih thu leh bazar rate aiin za zelah 20/30 vel zeta tlawma lei theih a nih tur thu a sawi. DGP hian Aizawla CSD canteen hawn hi a bultanna chauh a nih thu leh District tinah hawn a nih theihna tura hma a lak mek thu a sawi bawk.

Canteen hi vawiin atang hian dawr theih nghal a ni a, Mizoram Police te chuan an Identity Card kengin an dawr thei anga, pension tawhte pawhin Pension card hmangin an dawr thei ang. Mizo ten kan lo hmelhriat tawh Assam Rifles CSD canteen rate in bungrua te hi hralh a ni a, bungrua an lakna hmunpui Master Canteen pawh thuhmun an hmang a ni. Canteen-ah hian bungrua chi hrang 95 vel zet zawrhchhuah a ni a, item 450 vel chah mek a ni.

Hawnna inkhawm DIG (Northern Range) Pu C Zorammuana IPS kaihhruaiah hian Ist Bn. MAP Commandant Pu Lalbiakthanga Khiangte chuan report a pe a, Aizawl SP Pu LR Dingliana Sailo chuan lawmthu sawiin hun hnung a khar a ni.