1884/2022-2023
Aizawl, the 12th September 2022 : September ni 9 2022 khan DGP Mizoram Pu Devesh Chandra Srivastva, IPS chuan khum sawm (10) awmna Police Hospital building thar, 1st Bn. MAP Headquarters-ah a hawng. Building thar hawnna hun Police Hospital kawt zawla neihah hian Senior Police Officer, Dy SP chin chunglam bakah Armed Veng leh Armed Veng South Local Council te leh Police Hospital Staff te an tel a ni.

Hospital building hi NEDP 2018-2019 Scheme atangin UD&PA Department, Mizoram Sawrkar hnuaiah sak a ni a. November 1, 2019-ah sak tan niin April, 2022-a sak zawh hman tura ruahman a ni a, COVID-19 hri lengin a tihkhaihlak avangin hun tiam aia tlaiah sak zawh a ni ta a ni. A building hi feet 34 leh feet 22 biala sak niin, basement, ground floor leh 1st floor awmin, a vaiin cheng nuai 70 senga sak zawh a ni.

He Police Hospital hi 3rd Bn. MAP Medical Officer-in vilin, Staff Nurse panga (3 permanent & 2 attached), Lab Technician pahnih (1 permanent & 1 attached), Pharmacist pakhat leh thawktu dang 15 in an enkawl a ni.

He damdawi in atang hian Border Outpost-a duty te tan damdawi supply thin a ni a. Police-a thawk mekte tan te, an chhungte tan te, pension tawhte leh a chhehvela civil mite tan a thlawna pan theih reng a ni.

Police mi leh sate mai bakah a chhehvel mipuite tana chhawr tangkai theih tur Police Hospital building thar hlu tak petu State Sawrkar chungah Mizoram Police chuan thinlung takin lawmthu a sawi a ni.