Chief Minister Pu Lal Thanhawla chuan Police te chu an hnaah chhuantlak leh fak tlaka an inpek avangin an chungah leh anmahni enkawltu Home Minister Pu R. Lalzirliana hnenah lawmthu a sawi. He thu hi vawiina a office Conference Hall-a Crime & Criminal Tracking Network and System (CCTNS) chungchanga Police hotute nena sawihona an neih tuma a sawi a ni. Chief Minister chuan Police te chu tha taka hna thawk chhunzawm zel tura fuihin,  city night patrol pawh nei thei turin a fuih bawk a ni.

 

 

CCTNS hi Central sorkar-in police te tih changtlung nana National e-Governance Programme hnuaia project pakhat atana kum 2009 July thlaa a lo pawm tawh kha a ni a. Kum 2012 a zawh fel hman tura ruahman a ni. A thil tum tlangpuite chu : India ram chhunga Police Station zawng zawng Computer Software thuhmun (centre sorkar siam) hman tir a, crime record vawn that a, in pek tawn; Police officer-ten rang leh chak taka Crime an chhuichhuah zung zung theih nan ICT thiamna hman tangkai; Police Office hmunpui (Headquarters, District Office, SDPO Office, etc.) leh Police Station te Internet hmanga thlunzawm vek a, information rang zawka in pek tawn, supervision chak zawka kalpui; State leh Central Police Organisation hrang hrangin rang zawka Intelligence an in hlanchhawn theih nana ICT thiamna hman tangkai te an ni.

He project hmang tur hian Mizoram sorkar leh Central Sorkar chuan kum 2009 September thla khan MoU an ziak a, Mizoram sorkar chuan hemi denchhen hian kawng tam takah hmalakna a nei mek bawk  a ni.

He project sawihona hi Pu Zosangliana Addl. S.P. CID Crime Branch in power point hmangin sawifiahna a nei bawk a ni.

He hunah hian police hotute chu Pu Lalrokhuma Pachuau, DGP in a ho a, Home Minister Pu R. Lalzirliana, ICT Minister Pu Zodintluanga, Parliamentary Secretary Pu Lalrinmawia Ralte leh MLA Lt. Col (Rtd.) Z.S. Zuala te an tel bawk a ni.