Naupang leh Nu naupai ten chawtha an mamawh ang an dawn theihna tura Sawrkar laipui hmalakna Poshan Abhiyan (National Nutrition Mission) in kumkhat a tlin lawmna puala buatsaih Poshan Pakhuada chu vawiin khan Khawzawlah hman a ni a. Poshan Pakhuada hi vawiin chawhma dar 10:00 khan Area MUP Run, Khawzawl Vengtharah ICDS, Khawzawl Project bultumin hman a ni a, he hunah hian khawtlang hruaitute, YMA, MHIP leh VC aiawhte an tel tha hle.

Block Coordinator Pu Lalruatfela Sailo kaihhruaina hnuaia hun hmanah hian ICDS Khawzawl Project  CDPO Pi HB. Vanlalmawii leh Circle Officer Pu C. Vanlalzapa te chuan Poshan Abhiyan awmzia kalkhawmte an hrilhfiah a.  Poshan Abhiyaan Scheme kaltlangin taksa mamawh ang chaw tha ei phak loh avanga naupang thanthu leh pianphung leh rilru leh taksa hriselna lama rualpuite phak lo awm thin tihbo tuma hmalak a nih thu an tarlang a ni.

He hunah hian Anganwadi pawimawhna leh Scheme/Programme hrang hrang kalpuite zirhona neih a ni a. ICDS thawktute chuannu leh paten an fate kum 6 chin hnuailam Anganwadi a an kaltir a pawimawh thute an sawi bawk a. Hemi hnu hian naupangte tana tangkai leh hlawk zawka Anganwadi kalpui anih theih dan turte sawihona neih niin khawtlang hruaitu kalkhawmte chuan tuna an kalphung pangngai aia tha zawk a Anganwadi kalpui thei tur chuan Anganwadi Worker-te, khawtlang hruaitute leh nu leh paten kawng engkimah thawhhona tha an neih a pawimawh thu te an sawilang a ni.

Vawiin Poshan Pakhuada puala hun hma hi mipuiten an hlut hle a ni.