Vawiin khan P&E Engineering Officers’ Association chuan an pawl khawmpui lian vawi 17-na chu Aijal Club-ah an hmang a. Power Minister Pu Lal Thanzara’n a hmanpui a ni.

Pu Lal Thanzarah chuan Mizoram chu Rural Electrification Corporation Survey Report ah India hmarchhaka titha bera puan a ni, tiin thingtlang a eng pek kawngah power a hnianghnar zawk thenzawm state te aia Mizoramin a tih thatna chu P&E department hnathawktute leh contractor te thawhrimna rah a ni, a ti a. Mipuiin eng an neih that loh hlaua officer te leh an hnuaia thawktu, a te ber thlengin mahni nunna thapa hnathawk thinte chungah lawmthu a sawi a.An duty laia vanduaina tawkte leh, nunna hial chan ta te chu a tuarpui thu sawiin sorkar ang leh department anga tih theih apiang chu an chhungte chhawmdawl nan tih a ni ang, a ti.

Power department hnuaia hmalakna lian leh langsar deuh deuh, kum 2017 chhunga zawh hman beisei leh kum 2017 chhung veka hma lak thar tur te tarlangin Tlawva 5MW SHP, Kawlbem 4MW SHP, 110 Km 132 kV S/C Melriat-Lunglei, 33/11kV Sub-station Buarpui-Saiphai, 132 kV S/C line on D/C tower, Kolasib-Aizawl leh 132kV Sub-Station sawnna tur te chu kum 2017 chhunga zawh tur zingah an tel a, 33kV line on tower Aibawk-Sialsuk, 33kV Sub-Station Lawngtlai, Teirei 3MW HP renovation, Tuipanglui 3MW HP renovation, Maicham 2MW HP renovation, 33kV Subsations Thenhlum leh Zaizawhtlang renovation leh 132 kV line W.Phaileng leh Bairabi via Mamit(74Kms) te chu kum 2017 chhunga thawh tura hmachhawp ah an tel bawk a. Pu Lal Thanzara chuan P&E hmalakna chu chhuanawm a tiin, heng project hrang hrang te hi tih puitlin a nih vek hunah chuan ram rohlu leh thangtharte tan chhawr nahawmtur a ni, a ti a. Mizoram sorkar New Economic Development Policy hnuaia Reform in Power Sector managment ah hma thar lakna tur kawng a inhawn zau thu sawiin power hmasawnna tura ruhrel pawimawh din belh tur te, electirc supply system tih hmasawnna tur te leh khaihlak lova mipuiin eng an neih theihna turin NEDP Power sector managment hnuaia a ruahmanna siam turin engineer te chu an ngaihtuahna lo seng turin a chah a. Department hnuaia project te chu tha taka tih puitlin a nih theih nan department officer ten uluk taka contractor te hnathawh vila enpui turin a ti bawk a. P&E department in power supply dinhmun an puangzar thin chu thil tha tak a ni, tiin hemi bakah hian transsmission line leh sub-station an siam zawh te pawh mipui hriata puanzar ve thin ni se a ti a. Mahni hna theuh hre chiang a, hma lam pan zel thei tura intuai hriam reng tur leh sorkar leh mipui tan rinawm tak thawk chhunzawm zel turin engineer rualte chu a chah a ni.

PEOA khawmpui chawhma hun hi an President Er.Lalramliana, Chief Engineer-in a kaihruai a. Kum 2016-17 chhunga member boral sunna hun an hman bakah kumina superanuation pension a chhuak te thlahna an nei bawk a. POEA Adviser, Er. Liannghinglova Pachuau, Engineer-in- Chief in department hnathawh kalphung leh harsatna te tarlangin thu a sawi bawk a. Chawhnu inkhawm rorelah P&E department reorganisation chungchang leh a kaihnawih thil hrang hrang te rel a ni.