No.3298/2021-2022

Aizawl, the 7th December 2021 : Vawiin khan Power Minister Pu R Lalzirliana'n Maite khuaah SEDP sum cheng nuai 115 senga Mualpheng to Maite 11 kVA electric hrui zam thar chu Line Switch tinungin electric line thar chu a hawng a, hemi puala programme tawi Maite Community Hall a buatsaih a hmanpui nghal a ni.

Pu R. Lalzirliana chuan Maite khua in kawlphetha an dawn mek thlaktu tur line thar Sub Station lian zawk kaltlanga an dawng tur chu lawmawm a tih thu sawiin hei hi Maite khawtlang tan hmasawnna a ni a ti a. Maite khua chu buh thar kawnga khaw intodelh tak nia a hriat thu sawiin Mizo tlawmngaihna leh Mizo nun zemawi an chawinunna kawngah YMA leh khawtlang nu leh pa ten thalai te zirtirna an pek thin chu chhuanawm a tih thu a sawi bawk.

Power Minister chuan Sawrkarin state dang atangin kawlphetha lei nan sum tam tak a seng a, chuvangin kawlphetha renchem hi kan inzirtir leh kan ngaihpawimawh a tul hle a ti a. Ho te a lang, chhuna tul lova eng chhit te, pindan awmlohna a eng chhit te leh mamawhna awm miah lova current hman te hi kan chin loh a tha a ni, a ti.

Sawrkarin kawlphetha tha zawka mipuite a pekna kawngah tunhnaia line thar 132kv Melriat- Lunglei leh 132 Kv line Serchhip - E Lungdar commission te chuan power hlohna transmission loss a tih tlem a beisei bakah tha zawka mipuiin current an dawn a beisei thu a sawi a. Bairabi- Mamit-West Phaileng- Marpara line thar pawh hawn thuai beisei ani tih a sawi.

Line thar hawnna Maite Hall-a neih chu Er. Benjamin L. Tlumtea, Sr. EE, P&E Department chuan kaihruaiin Er. Lalduhzuala Sailo, Engineer-in-Chief, P&E Department chuan Technical Report a pe a ni.

Tun hma chuan Maite khua hian 33kV Sub Station Chhingchhip atanga Hmuntha kaltlangin power an dawng thin a. Hei hian bill pekna kawngah leh thil dangah harsatna a siamsak fo thin a. Vawiina line thar hawn tak chuan Maite khua in 132kV Sub Station Saitual atanga Mualpheng kaltlangin power an dawng tawh dawn a. Hei hian mipuiin bill an pekna kawngah te awlsamna a siamsak dawn bakah line pakhat a chhiat pawhin line dang atangin power an dawng thei dawn a ni. A line hlui Chhingchhip-Hmuntha-Maite hi km 38 niin tuna line thar Saitual-Mualpheng-Tawizo-Maite hi km 23.70 a ni thung a. Mualpheng to Tawizo realignment atan cheng nuai 41.75 sen niin 11kv line thar Tawizo to Maite zam nan cheng nuai 73.33 sen a ni.