Mizoram inthlan neih turah Lunglei District huamchhunga Presiding Officers leh 1st Polling Officers atana ruat te chu vawiin khan Saikuti Hall, Lunglei-ah kokhawm niin Lunglei DC/DEO Pu V.Sapchhunga hovin Training neihpui tan a ni.

He Training Programme for Polling Personnel hawnnaah thu sawiin Lunglei DC/DEO Pu V.Sapchhunga chuan Presiding Officers leh Polling Officers te mawhphurhna hrang hrang a hrilhfiah a, Election Commission-in kumin inthlan chhunga zawm tur kalphung thar tam tak a siam chungchang a hrilh bawk a ni. Polling Station leh a chhehvela dan leh thupek kenkawh that a tulzia te, voter’s identity endik chungchang te, EVM hmandan tur leh Polling Parties ten an duty-na hmun an pan dan tur ruahmanna siam tawh hrang hrang a sawifiah bawk a ni.

Vawiina training neihah hian Lunglei DC Pu V.Sapchhunga bakah Lunglei Addl. DC Dr.Andrew H.Vanlaldika leh Tlabung SDO (C) Pu Donny Lalruatsanga ten training an neihpui a ni. Lunglei Town Area chhunga Presiding Officers leh Polling Officers te tan a bik taka Training chu ni 11, 13 & 21 November 2013-ah neih a ni ang a, Lunglei Town Area pawnlam te tan ni 14,15 & 21-ah neih a ni dawn thung a ni.