NLUP Implementing Board (NIB) leh Information & Public Relations Deparment buatsaihin vawiin khan NLUP Media Cell leh Press mi ten Lungdai leh Sihphir-a NLUP bawng vulhtu te tlawhin an ranvulh te a hmunah an en.

Lungdai-ah hian NLUP hnuaia bawngvulh tanpuina dawngtu chhungkaw 28 an awm a. Heng zinga 10 te chu bawng vulha eizawng lai niin 18 te chuan NLUP hnuaiah bawngvulh eizawnna bul an tan ve mek a. Heng chhungkaw 28 ten NLUP bawng an dawn zingah hian 1 a thi a. A dang zawng chu an hriselna a tha in bawng 8 chuan tha takin no an hring tawh a ni. A dang zawng pawh hi a rai lai niin thenkhat chu no neih hun tep tawh te an ni a. A no hring tawh te chu a tlangpuiin nitin an hnute litre 8 vel an sawr a ni.

Lungdai-ah hian chhungkaw 50 vel bawngvulha eizawng an awm a. Milk Producers Co-operative Society din in pawl hnih ah an inhlawm khawm a. NLUP bawng an dawn te hi ran huanga dah nghal mai lovin hun eng emaw chen an khung hran hnuah an bawng neihsa te nen an khung pawlh chauh va. Beneficiary 1 tih loh bawngvulhtu dangte chuan an bawng dawn ten eng natna mah an vei lo tih an sawi a. Bawng pakhat erawh chu bawng kena hri vei anga a lan avangin damdawi nena enkawl a ni a. Tunah chuan a dam tha tawhin no pawh a nei tawh a. A ruala bawng pakhat dang an dawn pawhin a natna chu a kai lo tih a neitu chuan a sawi a. Lungdai-a NLUP bawng vulhtute chuan an ran dawn te chu a chaw pek ah leh enkawlna kawng hrang hrangah bawng dangte aia enkawl an harsa lo nia an sawi rualin bawng dangte ai chuan an chaw lak a na lo zawk niin an sawi. NLUP bawng an dawn te chu tha an tiin sorkar chungah an lawm tak zet tih an sawi a ni.

Lungdai-a bawngvulhtu te hi an tangrual tha hle a. Lungdai Milk Producers Co-operative Society ten thla tin bawnghnute atanga an lakluh hi nuai 10 vel a ni a. Ran In sa theilo te pawh inpui tawnin bawngpui thi te chu Rs.5000/- in an inral thin a ni.

Hetih lai hian Sihphir-a NLUP bawng dawngtu te erawh chuan an bawng dawnin an beisei a phak loh thu Media Cell leh Press mite an lo hrilh a. Sihphir ah hian bawng bik-ah beneficiary 104 awmin chhungkaw 100 hnenah bawngpui 2 theuh pek a ni a. Heng zinga bawng 41 chu an thi a. Thenkhat erawh chuan tha taka no hringin an hnute sawr tur pawh a awm tawh a. Beneficiary zing ami Zonunsanga chuan a bawng dawn 2 ten no an nei ve ve tih sawiin ni 1-ah bawnghnute litre 17-20 a sawr mek tih a sawi a. Hetih lai hian beneficary dang Malsawmtluanga erawh chu a bawng dawn 2 an thi ve ve thung a ni. Sihphir ah hian NLUP bawng tam zawk chuan no an pai mek a, bawngvulhtute chuan an ran dawn ten no an hrin hma chuan an nihna tak sawi har an ti a. NLUP hmanga sorkar-in eizawnna a ngaihtuah sak chu lawmawm an tiin a bik takin harsatna an tawh chungchangah Vety doctor te inpekna ropui an ti em em a. An eizawnna bul berah vanduaina nasa tak an tawh mek chu na an tiin hei hi politics a remchangah tumahin an laksak an duhlo tih an sawi a. Hemi rual hian vanduaina tawkte chhawmdawlna tur sokarin ngaihtuah sak thuai se an duh tih an sawi bawk a ni.