Sorkar laipui sum senso a Rs. 15, 87,65,000 senna tur SIRD Complex Mizoram, Aizawl, Durtlang a North East Consultancy Services (NECS) - in an sak mek chu vawiin tlai dar 3:30 khan Rural Development Minister Pu R. Lalzirliana’n a tlawh a, SIRD hotute leh a satu NECS hotute nen office leh thawktute chenna tur quarters building hrang hrang sak mek te fangkualin an enfiah. Central sorkara Ministry of Rural Development duh dan angin SIRD hi Kolasib bakah Mizoram khawpui Aizawl a dah turin hetiang hian hmalak a ni a. A sum senso zawng zawng hi sorkar laipui tum tur a ni a, state sorkarin a ram hi a lo ngaihtuah sak ve thung a ni. A ram zau zawng hi 6,442.62 sq.m a ni a, building 8 sak mek chu ground floor plinth area 1653.95 sq.m a zau a ni.

Minister Pu R. Lalzirliana chuan hetiang hmun sa thei Zofate zinga an awm chu ropui a tih thu leh an hnathawh dan te lungawithlak a tih thu a sawi a. SIRD Director thahnemngaihna leh inpekna ah lawmthu a sawi bawk.

Minister hi Parliamentary Secretary Pu Lalrinmawia Ralte bakah RD Secretary Pu K. Riachho, SIRD Director Pu Lalramnghaka leh official dang ten an tawiawm a ni.