Mizoram KVI Board Chairman Pu K.Lianzuala chuan nimin 12.7.2012 khan Govt. High School Chhingchhip ah Rs. Nuai 32 seng a sak thar RMSA Building a hawng.

He RMSA Building thar hawnna inkhawm ah hian Bialtu MLA ni bawk Pu K.Lianzuala chuan thu sawiin “Ram chhung State tam takte zingah Mizoram hi RMSA sum hmang dik leh hmang tangkai ber a ni a, Chief Minister Pu Lal Thanhawla leh kan Education Minister te hmalakna avangin Mizoram ah RMSA sum thahnem tak hailuh a ni a, chung sum hmang chuan hetiang Building hi sak theih a ni a. Education Department leh RMSA hotu lam ten an sum dawn ang ang tangkai leh remhre taka hma an la thin hi an fakawm tak meuh a ni” a ti.

Pu K. Lianzuala chuan Sorkar in School building leh hmanrua tha tak tak in min thuam chho mek a, zirlai leh nu leh pa ten tih ve tur tam tak an nei a, lehkha zir theih nan a khawtlang boruak tha tak siam te nu leh pa mawhphurhna a ni a, zirlaite pawh in ti mai mai lovin tumruhna tak tak nen lehkha zir a ngai a, Central Service a lang pha hial tur a zir turin zirlaite a fuih a ni.

Pu K. Lianzuala chuan Chhingchhip a Sainik School sak mek a hmun ah a tlawh nghal a, hnathawktu Prasad Company hotute kawm in an hmalakna a thlir nghal a. Harsatna an tawhte sawipui in puih an ngaihna ah puih a inhuam thu a hrilh a, an hnathawhna ah thahnem ngai turin a chah bawk a ni.

Pu K.Lianzuala hi Pu C. Zolawma DEO Serchhip, Pu Lalthanghuta Sailo, Addl. Project Director (RMSA), Mizoram KVI Board Official ten an tawiawm a ni.