Tun hnai November 21 atanga 25, 2019 thleng, a zawna ni thum chhung ngawt mai Federation of Mizoram Samagra (SSA/ RMSA) Employees (FEMSE) te'n Zirna Inahte leh an office hna chawlhsana sorkar kar nana a ruala chawlh an la thut mai hian min barakhaih hle a, a pawi ka ti takzet a ni. Mizoram hmun hrang hrangah Zirna In a chawl thup a, zirlai naupang rilru thianghlim tak takte an zirlai zir zawm thei lovin an exam thei lo va, naupang bakah an nu leh pate thlengin rilru chiai tak puin an awm phah a, hetiang hi thleng lo se ka duh a, a pawi ka ti takzet a ni.

FEMSE te'n sorkar kar nana resolution/ultimatum an siam hi November ni 8, 2019-a Chanmari YMA Hall, Aizawla inkhawmpui an neih tuma mi a ni a. Heng an thil ngiat hrang hrang ziahna resolution hi Chief Minister emaw, ka hnenah emaw engmah official-a inhriattirna a awm lo va. Chu bakah sorkar thar, kum khat em pawh la hmang tha thum lo chuan hun hmasa lama an thu lo thlente ngai pawimawhin an tan ngaihtuahna a sengin hma a la chho mek a ni a; hlawh pawh mumal taka an lak theih nan theihtawp chhuah a ni. Central sorkarin an hlawh tur a rawn tih tlem avangin tunah hian state sawrkarin kum khatah cheng vaibelchhe 27 chuang a sen belh mek zawk a ni. An thil phut; hlawh tih san leh zirtirtu hna ruak 70% an hauh chungchang hi tun dinhmunah sorkar tan tihfel a, han tihhlawhtlin nghal rum rum theih a nih loh avangin FEMSE te pawh an nawrh titawp a, dan pangngaia kal leh tura ngenin sorkar chuan kan lo hriattir tawh a ni.

Tin, SSA (Elementary)-te hian Mizoram sorkar chu an service chungchangah Guwahati High Court Aizawl Bench-ah an khing mek a [WP(C) No. 128 of 2019]. Court thu kal lai a nih avang hian court-in a rel fel hma chuan an chungchang thua hmalakna kal mek pawh sorkar tan thutlukna engmah siam theih a ni rih lo bawk a ni.

Hetih mek lai hian sorkar-in a ngaih pawimawh em em zirlai naupangte hmakhaw ngai zo lova, naupang exam ti khaihlak zawnga hma laa, sorkar thu an zawm duh lo hi pawmzam harsa a ti a. Chuvangin Mizoram sorkar chuan hreh tak chungin sorkar thu zawm lo zirtirtute chungah 'action' a lak a lo tul ta a, phalna tel lo a, ni thum lai an chawlh chhung zawnga an hlawh hi pek an nih loh tur thu hriattir an ni tawh a. Hei bakah hian November 26 (Thawhlehni) leh ni 27 (Nilaini), 2019 atanga sikul/office kai duh lo chu sorkar hmalakna ring tawk lovah ngaiin, he an hnathawh mekah hian tui tawk lo leh thawk chhunzawm duh lovah sorkarin a ngai dawn a, show cause notice pek an ni dawn a ni. Sorkar thu zawm lote lo chhinchhiah a, a tul anga report pawh lo buatsaih turin sikul tin Headmaster, Local Council/Village Council leh Village Education Committee (VEC) te kan ngen a ni.

Zirlai naupangte'n dan pangngaia zirlai an chhunzawm leh vat nan leh exam pawimawh tak an hmachhawn theih nan Mizoram sorkar chuan a tih tur a tih a tul a; hmun hrang hranga LC/VC leh VEC hruaitute an huam chhungah zirtirtu atana qualify ngei, sorkar thu zawm lote aiawh tur November 28 & 29, 2019 chhung hian lo zawng hmu a, bialtu DEO/DPC hnena thlen turin kan ngenin kan beisei nghal bawk.