4009/2024-2025

Dated the 29th January, 2025 : Vawiin January ni 29, 2025 (Nilaini) hian SCERT, Mizoram Auditorium Chaltlangah WORKSHOP ON JADUI PITARA AND  e-JADUI PITARA neih a ni a. He half day workshop hi North East Regional Institute of Education (NERIE), NCERT bultuma buatsaih niin Primary School zirtirtu 53 leh Angwandi Worker mi 28 an tel.

Workshop khuhhawnna inkhawm hi Pi Florence Lalrinpuii, Deputy Director chuan kaihhruai a. He hunah hian Pi Caroline Zoramthangi, Director, SCERT chuan kalkhawm telawmna thu a sawi a. NE state zingah Mizoram hi mahni ṭawng leh hnam ziarang mila Jadui Pitara Contextualised hmasa ber kan ni tih a sawi. 

NEP 2020 leh NCF-FS 2022-in naupang kum 3 – 8 inkarte zirna kalpui dan tur a duan ang zulzuia siam Jadui Pitara hi SCERT Mizoram chuan Mizoram mila her rem a thil ṭangkai tur ṭhenkhatte dah belhin, Thiamna Thûl tiin a vuah thu a sawi a. Domain tina naupangte hmasawn theihna turin Thiamna Thûl-ah hian zirna hmanrua sawmthum (30) dah niin,heng hmanruate hmanga infiamna leh activity hrang hrangte aṭang hian naupangte chuan chîk taka ngaihtuahna hman thiamnate leh harsatna sutkian dante an zir chhuak thei dawn a ni. Tualchhunga hmuh mai theih hmanrua, infiamna bungrua leh hnam ziarang pho lang theite pawh Thiamna Thûl-ah hian seng luh belh theih a nih thu sawiin Jadui Pitara workshop hi chhawr ṭangkaia hlawkpui ngei turin zirtirtu kalkhawm te a chah bawk. 

Workshop ah hian Resource Persons – Dr. Elizabeth Gangmei Professor NERIE, NCERT leh Dr. Albert Horo, Associate Professor, NERIE, NCERT, Sillong Meghalaya te bakah Pi Ngurnunsangi, SCERT te chuan Jadui Pitara leh e- Jadui Pitara pawimawhna te, ṭangkaina te leh a hman dan tur te sawiin kalkhawm te an zirtir.