705/2022-2023
Dated Serchhip, the 31st May, 2022: India ramin zalenna a neih kum 75 na lawmna pakhat atan vawiin hian Prime Minister zahawm tak Pu Narendra Modi chuan rampum huapa sawrkar laipui schemes hrang hrang dawngtu mipuite video kaltlanga kawmna “Garib Kalyan Sammelan” chu Shimla khawpui, Himachal Pradesh atangin a nei a. Serchhip DC Conference Hall atangin he hun hi lo zawm ve a ni.

Prime Minister hun hman hma deuh hian Serchhip DC Conference Hall Pi Lalzikpuii, SDO Sadaar kaihhruaiin inkhawmna lo buatsaih hmasak a ni a. He hunah hian Pu Lalmuansanga Ralte, Addl. DC chuan thusawiin India sawrkarin miretheite chawikanna hmalakna a duan thinte zarah India ram chu kum reilote chhungin khawvela ram ropui berte zinga miah a inhlangkai tih a sawi a. Heng hmasawnna hmalakna te hi Mizoram mipuite pawhin kan chhawr nasa thin hle a ni a ti. Sawrkar atanga tanpuina leh chhawmdawlna dawngtuten dik tak leh tangkai taka hmanga, hmasawnpui nana lo hmang ngei thin turin a chah bawk.

He hunah hian Pu F. Lalsanglura, Sr. EE, PHE te, Pi Lalthanghliri Pautu, DUDO te, Pu Lalthanmawia, DCSO ten an department kaltlanga sawrkar laipui hmalakna an kalpui mekte kalkhawm mipuite an hrilhfiah a ni.

Hemi hnu hian Prime Minister in Shimla atanga ram pum huapa inkawm hona hun a buatsaih chu thlunzawm a ni. Vawiina Prime Minister hova inkawmnaah hian sawrkar department pakua kaltlanga kalpui mek Central Scheme hrang hrang sawmparuk (16) hnuaia tanpuina dawngtute nena hun hman a ni a, Serchhip district a heng scheme kalpuitu department officer te, tlawmngaipawl hruaitute leh scheme dawngtu mi engemawzat vawiin hian an kalkhawm a ni.

Attachment

  • Loading attachment...