3873/2024-2025

Aizawl, the 18th January, 2025: Vawiin khan Prime Minister Shri Narendra Modi chuan Survey of Villages and Mapping with Improvised Technology in Village Areas (SVAMITVA) Scheme kaltlangin India rama State 10 leh Union Territory 2-a in hmun neitu nuai 65 chuangte hnenah property card a sem chhuak. Vawiina property card sem chhuah zingah hian Mizorama khua 18 atanga property card 1754 pawh telin he hun hi Governor Gen (Dr) VK Singh, PVSM, AVSM, YSM (Retd) chuan Raj Bhavan atangin biakhmuh theihna kaltlangin a telpui a ni.

Governor Gen (Dr) VK Singh, PVSM, AVSM, YSM (Retd) chuan Mizoram chu North Eastern Region zinga Property Card sem chhuak hmasa ber a ni chu chhuanawm a tih thu sawiin, Land Revenue & Settlement hotute chu SVAMITVA scheme hnuaia hmalaknate a hlawhtlin theih nana tan la chhunzawm zel turin a chah a. Mizoram atanga hamthatna dawngte a lawmpui thu sawiin duhsakna a hlan a ni.

SVAMITVA scheme hi April ni 24, 2020 khan Prime Minister-in a hawng a, in hmun neitute tana revenue document felfai tak, drone survey leh GIS technology hmanga chhinchhiah thlapna a ni a. Bank loan lak nana dahkham bakah pawimawh dangahte pawh a hman theih a ni. 

Hemi kalpui tur hian Mizoram Sawrkar leh Survey of India te chuan thawhhona thuthlung July ni 8, 2021 khan an ziak a. Revenue survey la tihlohna khuaahte December ni 9, 2021 atang khan drone survey tan niin, December ni 2, 2024 khan zawhfel a ni a, District 9 a khua 319 ahte drone survey hi neih a ni. 

Mizoram chu North Eastern Region zinga Property Card sem chhuak hmasa ber niin, April ni 24, 2023 khan property card sem chhuah tan a ni a, vawiina sem chhuah nen hian tun dinhmunah Mizoramah Property Card 2,909 sem chhuah tawh a ni a. Ruahman dan chuan hemi hmalakna kaltlang hain Mizoramah Property Card 35,000 bawr vek pek chhuah tum a ni. 

He hunah hian Land Revenue & Settlement Department Minister Pu B. Lalchhanzova, Secretary Pu Vanlalmawia, Addl. Secretary Pu Lalhmunsanga Hnamte, Jt. Secretary Pu V. Lalduhzuala, Director Pu R. Lalthazuala leh Official dangte pawh an tel a ni.